حد فكر..مره جرب..إنه يصرخ
إنه يشرخ عن جدار الصمت
حد كرر أنه يرقص..يبتسم
يلمس حرير حلمة..يتكسر
حد دقق مرة فى عيون البنات
حد صور لوعة فى عيون أمهات
حد شاف الضهر محنى فى الحارات
حد فات جمب المظاهرة..سمع السكات
حد فكر..مره جرب..إنه يحلم
إنه يغزل من ضفاير ليل طويل
بدر يضوى على السبيل
حد عنده الجرأة يشرب سلسبيل
حد مصرى يوم الزحف..خاف
حس فى القلب ارتجاف
حد فاكر نصر بعده سنين عجاف
حد شاف الجندى بعد الفتح..يتقوت بحاف
حد شاف الشعب متشعبط فى باص
حد لم الأجرة فى ميكروباص
حد شاف فى الجبهة فخر
وسط تجاعيد المعاش
حد عاش؟
يحلم مشبك إيده فى إيد بنت الجيران
حد خلد اسمه فى قلب..
منحوت على شجر الميدان
حد يوم فضفض لحضن النيل
وسهر مستنى الجواب
حد غاب؟
تحت سراديب حكمته ..يتمنى انتخاب
حد وقع على البيان
حد افتى قال حرام
ذكر "تغيير" فى تراصيص الكلام
حد لخص كل لبسه..خلف باب
حد فكر..مره جرب ..إنه مصرى
حد مسلم..حد قبطى
هى خبيتك نفس خيبتى
حتى فخرك نفس فخرى
قوم يا صاحبى
ضل فاكر
إنت مصرى
بس
مصرى
صورة أرشيفية
مشاركة
اضف تعليقاً واقرأ تعليقات القراء
مشاركة
لا توجد تعليقات على الخبر
تم أضافة تعليقك سوف يظهر بعد المراجعة