◄◄ زكريا عزمى هو الأفضل لقيادة البرلمان لوقف مهزلة قيام أحمد عز بتشغيل د. فتحى سرور
◄◄ اشتكيت للرئيس فقال لى أنا معاك وتانى يوم أخبرنى عفت بترشحه على قوائم «الوطنى»
أعلن النائب طلعت السادات أنه يفكر فى الانسحاب من انتخابات مجلس الشعب القادمة، وأن يأخذ استراحة محارب بعد أن تعب خلال سبع سنوات، قضاها كنائب ما بين مرض وتلفيق قضية رشوة ودخول سجن وتضييق عليه حتى داخل مكتبه.
فسألناه هل تشعر باليأس؟ فأجاب قائلا «لا، ولكنى أشعر بأنى أحارب لوحدى فلم يقف معى أحد فى محنتى، لا الشعب ولا القانون ولا حزب»، وتساءل «إلى متى يظل الشعب ساكت وكأنه فى غفوة».
وأكد السادات فى حواره لـ«اليوم السابع» أنه لن يحزن لو لم يدخل مجلس الشعب القادم لانه يتوقع عدم استمراره، مشيرا إلى أن الدكتور سرور- على حد قوله- هو الذى قتل مجلس الشعب، ورحب بأى تغيير فى رئاسة المجلس، وتمنى أن يتولى الدكتور زكريا عزمى رئاسة البرلمان لأنه قادر على أن يعيد إليه هيبته.
كما تطرق فى الحوار إلى تفاصيل أخرى حول ترشيح شقيقه عفت أمامه فى دائرة تلا فى الانتخابات القادمة وموقف العائلة من ذلك.
◄◄ إيه اللى حصل معاك منذ دخولك مجلس الشعب؟
- اللى حصل معى كنائب على مدى سبع سنوات قضيتها فى البرلمان لم يحدث مع أى نائب آخر، فتعرضت لكل أنواع المضايقات من معاكسات وإرهاب وافتراءات ودخول السجن وتلفيق قضايا وتدهور فى الصحة، وأنا اللى قلبى كان حديد تعب حتى إنى فى الآخر لجأت إلى الاتحاد البرلمانى الدولى كأول برلمانى عربى، واشتكيت ليهم مما يحدث معى وقلت لهم الحقونى أنا مش عارف أعيش ولا أتحرك ولا أمارس دورى البرلمانى، وأصدر الاتحاد بيانا شديد اللهجة أعربوا فيه عن قلقهم ومخاوفهم مما أتعرض له، واتصلوا بالنائب العام والدكتور سرور وأكدوا فى بيانهم أن ملفى مازال قيد التحقيق وأنه سيتم نظره فى 5 أكتوبر القادم، وأرسلت صورة من التقرير للرئيس مبارك وتلقيت مكالمة من الأخ سليمان عواد أخبرنى فيها أن الرئيس يبلغنى بأنه معايا ومفيش حاجة هتقف فى سكتى، وان الرئيس عمره ما اتاخر عن أى حاجة لى، وثانى يوم فوجئت بشقيقى عفت يمر علىّ ويخبرنى بانه قدم أوراق ترشحه للحزب الوطنى، فقلت له على بركة الله وسألته انت عديت على أبوك فى المقابر واستأذنته فرد علىّ أنا باستأذنك انت، وعلى فكرة الحزب الوطنى حاول مع شقيقى الاصغر زين أن يترشح فلاح أمام أنور السادات لكن زين رفض.
◄◄ بماذا تفسر استخدام الوطنى لشقيقك فى ضربك؟
- أنا عارف إنى لست من الناس الذين يرغب النظام فى مجيئهم، لأن لى رأيا لن أحيد عنه ومش ها أغيره، لانى مش ها أقابل ربنا يوم القيامة واقوله أنا خفت من الرئيس مبارك أو أن حبيب العادلى قرصنى فخفت منه، ومفيش حد وقف معايا فى محنتى أثناء السجن، إلا الناس الغلابة، كان فى ناس قلوبها معايا، لكن كان فيه أيضا ناس وقفت ضدى وأولهم جمال السادات طلع بيان هاجمنى فيه، الواحد يبقى مش لاقى ياكل لكن كرامته فى السماء، ولذلك لو أنا اعطيت أحد حاجة من اهالى تلا بتكون محبة وليس بهدف انتخابى.
◄◄ هل ترى أن العائلة لو اجتمعت على ترشيح شخص معين يمكن أن تلتزم بهذا الاختيار؟
- مافيش حد ليه كلمة علىّ، وأفكر بعقلية والدى عصمت السادات وقلبه، وهو زرع فىّ إنى أكون رئيس اللجنة المصرية لتخليد ذكرى السادات فى أحلك الظروف فى عام 83 فى الوقت اللى كان الناس بتخاف تيجى تحضر الاحتفال، وعلى فكرة عصمت السادات فقد بصره ومات كمدا لانه لم يأخذ «تار أخوه»، وذات مرة دخلت عليه غرفته ووجدته يبكى وينتحب كالنساء فاعتقدت أنه يبكى على موت شقيقى النقيب رامى «6 2» سنة، فقلت له معلهش ما تزعلش دا عند ربنا، قال لى أنا لا أبكى على موت ابنى ولكن لانى مش قادر آخد تار شقيقى السادات لحد دلوقتى، هذا هو عصمت السادات اللى زرع داخلى أفكاره، ولا جمال ولا خمسين زى جمال يقدر يشيله، وللعلم بعد وفاة أنور السادات كنت أذهب أنا ورقية ابنته، ودى بميت راجل، نعمل السنوية فى ميت أبوالكوم فكانت تقولى أنا علىّ البن وانت عليك الشاى اللى بنقدمه للناس، لان ظروفنا كانت تعبانة، وكانت رقية بتاخد معاش وقتها 390 جنيه وتقولى خده علشان نعمل عشاء للناس اللى هتيجى وأجرة الفقى اللى هيقرا، وكان جمال ييجى يقعد عشر دقائق ويمشى، ثم نفاجأ به اليوم يقول لى لا تتكلم باسم السادات، وشوفوا الفرق بين عائلة السادات وجمال عبدالناصر دا لوحد اتكلم على الرئيس جمال ولاده كلهم بيطلعوا ياكلوه، لكن للأسف جمال السادات مفيش، وعايزنا إحنا كمان مفيش.
◄◄ ألم يسبب ترشح شقيقك أمامك شرخا لك؟
- لا أبدا لأنى ببساطة لو فيه واحد فى مركز تلا شايفه يقدر يخدم أهالى تلا أنا أرحب بيه.
◄◄ يمكن عفت رشح نفسه علشان يحافظ على المقعد فى العائلة خوفا من رسوبك؟
- حتى الآن مش عارف هل الحزب الوطنى جاد فى ترشيحه؟ وهل سيختاره المجمع الانتخابى أم أنها مجرد فتنة عائلية؟ لكنى بعون الله لو الانتخابات تمت بنزاهة واى مخلوق فى مصر ينزل أمامى فى ظل إشراف قضائى هدغدغه.
◄◄ ألم تفكر فى الانضمام للحزب الوطنى لحل هذه الإشكالية؟
- لا، وبالنسبة لى الحزب الوطنى عيّل تايه يا ولاد الحلال ومسيره يرجع، فالوضع فى مصر بصفة عامة مخزٍ، وأرفض إن يحكمنى شوية عيال معاها فلوس، وهى فلوس الشعب الغلبان اللى مش لاقى يجيب كيلو لحمة أو فرخة وبيقتلوا بعضهم امام الافران علشان رغيف الخبز وطبعا شوية أقلية بيحكمونا مش حاسين بالشعب.
◄◄ تقصد مين بالأقلية الحاكمة؟
- النظام والبابا شنودة وتحت كل واحد منهما ألف بيحكموا 82 مليون مصرى، وللأسف الشديد واحد مثلى قعد 7 سنين فى العمل السياسى لم أجن من ورائها إلا نارا فى بيتى، وطبعا الناس متعودة من اللى بيعمل فى العمل السياسى فى مصر ان يحقق مكاسب مادية هائلة، حتى إن هناك معارضين اغتنوا وأصبح لديهم ملايين فى البنوك وقصور فى أكتوبر بسبب أنهم ارتدوا ثوب المعارضة ومنهم صحفيون، وأنا لى ربنا وأهلى فى تلا اللى هيوصولونى يوم ما اموت، ومش طمعان فى اكتر من كده. وأنا لن أبتعد عن السياسة حتى لو لم أدخل مجلس الشعب، اللى أنا شايف أن الدكتور سرور قتله فقد لعب فى اللائحة بحيث سمح لاعضاء الوطنى بأن يردوا على الاستجواب الذى يقدمه النائب، حتى أنى لم أناقش اى استجواب قدمته لوزير الداخلية على مدى سبع سنوات فى مجلس الشعب، ولم أسافر مع لجنة فى زيارة داخلية مش هاقول خارجية، لان دى ليها ناس، وفوق كده ممنوع آخد الكلمة فى البرلمان.. باختصار فتحى سرور موظف بيؤدى عمله مظبوط طبقا للتوجيهات اللى بياخدها، دا احنا فى المجلس وصلنا إلى درجة ان الاخ احمد عز هو اللى بيشغل فتحى سرور؟ فالذى يدير مجلس الشعب حقيقة هو المهندس أحمد عز والدكتور سرور قاعد بيروح ليه توجيهات من خلال ورق رايح جاى، ومع احترامى لشخصه كرجل قانون عظيم لكن كرجل سياسى يعمل موظفا عند النظام، وأنا عايزه يفهم أن أعضاء مجلس الشعب مش جايين يشتغلوا عند أهله، وكلمة عند أهله مش شتيمة، لان الدكتور سرور كان دايما يقولها فى حواراته الجانبية، وقالها لى ذات مرة فى إحدى المشادات فى مكتبه، وقال لى أنا ما باشتغلش عند أهلك، فرديت عليه وقلت له انت تعرف أهلى انت تطول تشتغل عندهم.
◄◄معنى كده أنك بترحب بتغيير رئاسة المجلس؟
- يبدو لى أن ترشيح الدكتور مفيد شهاب محتمل وسيكون تغييرا محمودا لصالح مصر، لانى لا أعتقد أن الدكتور مفيد شهاب هيكون زى سرور ولكنى آمل أن يحذو حذو رفعت المحجوب، وطبعا الدكتور سرور عمل اللى عليه، وكفاية عليه كده أضر بالشعب والبلد، وشهاب مش وحش، على الاقل مش هيبقى زى سرور. وفى يوم من الأيام قلت لسرور أنا لم أنتخبك ومش هانتخبك لكنى أنتخب شهاب، وإن كنت أتمنى أن يرأس الدكتور زكريا عزمى مجلس الشعب لانه رجل محنك وسياسى ومحبوب من جميع التيارات السياسية بما فيها المعارضة وفوق كده لن يسمح لشخص مثل عز بأن يدير المجلس.
◄◄ ماذا ستفعل إذا المجمع الانتخابى جاء بعفت؟
- ساعتها لكل حدث حديث، أنا كل اللى يهمنى مصلحة أهالى الدائرة فإما إنى أقول لعفت اقعد وإما انى آخد استراحة وأنسحب وأترك الانتخابات لعفت، وهتبقى استراحة محارب على اعتبار إنه هيخدم الناس، لان المجلس القادم فى تقديرى سيكون عمره قصيرا لاحتمالات تغيير شخص رئيس الجمهورية ولاحتمالات صدور أحكام ببطلان الانتخابات.
◄◄ هل أخذت قرارا بالانسحاب فعلا؟
- قرارى لم آخذه بعد بدليل أنا كل يوم فى الدائرة لكن أنا تعبت ومحتاج أستريح وأعيش طبيعى مع أسرتى بدون رعب، أنا لم أتمتع بحصانة فى مجلس الشعب دا فتحى سرور رفع عنى الحصانة يوم إجازة رسمية.
◄◄ ما معنى الاستراحة هل ستتوقف عن السياسة؟
- استراحة من مجلس الشعب اللى ليس منه فايدة، واللى لو فضل فيه واحد زى سرور يبقى لازمته إيه، واللى اسمه مجلس الشعب وهو ليس له علاقة بالشعب، واللى كنت باترك جلسات جناية فى محكمة من أجل جلسة مجلس رغم انى باخد اتعابى من هذه القضايا وليس من المجلس ولن أتوقف عن ممارسة العمل السياسى لانى رجل محاماة وهى كلها سياسة، لكن القضية لو أنا مت ولادى هيعيشوا منين.
◄◄ ماذا تقول لعفت لو خاض الانتخابات وانسحبت؟
- أقول له ربنا يوفقك أنت أسد وابن أسد وأخو أسد ومركز تلا كله أسود خليك أسد واوعى تقلل من نفسك وحب الناس لك، واوعى تلعب مع الكلاب لانك محسوب على الرئيس السادات اللى الناس بتعشقه لحد النهارده.
◄◄ معنى هذا أنهم نجحوا فى إرهابك؟
- لم يرهبنى أحد لكنى باحارب لوحدى وبدون غطاء، لا الشعب معايا ولا قانون ولا حزب، مافيش غير ربنا ولو جرى لى حاجة ولادى هيعملوا إيه؟ أصل زمان كانوا يقولولنا ما تلعبش مع الكبار لان الكبير بيلعب على كبير، كان بيراعى نقاطا معينة عند اللعب لكن دلوقتى اللعب مع الصغار ليه حسابات معينة، لازم تفكر بعقلية الصغار وتبقى صغير مثلهم ليس لديهم قيم ولا مبادئ والفلوس بعبط مش بهبل، هاتى واحد أخد أرض فى خليج السويس مازال محتفظا بها حتى الآن.
◄◄تشعر بأن اليأس تملكك؟
- لم أيأس ولكن الناس واخدة استراحة والسؤال : إلى متى يا شعب مصر هتفضل تتفرج وتاخد استراحة وتقعد ساكت وهم بيسرقوك ويذلوك ويبهدلوك ويسرقوا صوتك لحد ما هتوصل زى الارجنتين، بعد ما شطبوا على ثروات البلد فبعد أن هربوا الآثار وخلصوا عليها بدأوا فى تهريب اللوحات. الدورة الاخيرة استخدموا معايا كل أساليب الحرب فكانت سنة سجن وسنة قضيتها فى المستشفى وسنة تلفيق قضية رشوة، دا غير محاولات الأمن للناس اللى بيشتغلوا معايا سواء فى مكتب المحاماة هنا أو فى تلا لتجنيدهم وعلشان كده أنا عمرى ما باقفل على درج فى مكتبى وإجبارهم على ان يكتبوا تقارير عنى، وصل الأمر أنهم زقوا واحد لابنى اتهمه بانه ثنى لوحة سيارته وخرجت قوة من القسم للقبض على ابنى فى الحال وكنت وقتها فى السجن.
◄◄ما هو تصورك عن الانتخابات القادمة؟
- هيبقى فيها دم، وأنا طبيعى قبل ما باخرج من بيتى يوم الانتخابات باتشاهد ثم أذهب للمدفن اقعد مع ابوى وجدى والاسرة واقولهم نفسكم معاى أنا ممكن آجى ليكم بعد نصف ساعة وبعدين اذهب لمحل عصير قصب أشرب شوية حلوين واروح على البيت انام لحد ما التصويت ينتهى وأنزل على فرز الصناديق لانى واثق فى ناسى.
◄◄كيف ترى هوجة ترشيح الوزراء فى الانتخابات؟
-الوحيد من الوزراء اللى شايفه أكبر من الترشيح على مقعد مجلس الشعب هو اللواء عبدالسلام المحجوب، وكنت أرى أنه يستحق الترشيح على مقعد الرئاسة، وأقول له دى الدائرة اللى انت مترشح فيها اسمها الرمل، هو فيه حد بيلعب فى الرمل؟ لكن طبعا هوجة ترشيح الوزراء هدفها ضمان مقاعد بدون اللجوء للتزوير لأن مافيش حد هيقدر يرشح نفسه أمام وزير خوفا من سلطته وسطوته.
تم أضافة تعليقك سوف يظهر بعد المراجعة