فيسبوك
واتساب
محتار وعايز فرصة عمل فاقد كل خطوط الأمــــــــل
ياما سمعت وعود وعهود وحلم رسمته ضاع واختمل
محتاج مش لاقى إيد تتمد وكل ما بفتح باب يتســـد
أسيب ترابك أنا يا بلادى اتهان واتبهدل أمد اليــــد
وكل مابرجع أحلم تانــى ألاقى طريق الحلم اتهــــد
متحطم من يأسى بعانـى والكل ناسينى سلبى أنانى
معايا شهايد مش نفعانى وابعت شكوى ماجانى الرد
نفسى ألاقى عمل يكفينى مش عايز أنا ملايين تتعـد
مش عايز أنا فيلا وعربية عايز لقمه يا دوب ع الكد
أنا محروم فعلا ًمن خيرك بهاجر أشحت أنا من غيرك
دا أنت يا بلدى نبع حنان ليه ما بتدى حنان لطيرك؟
مقفول قدامى كل طريـــق مش لاقى حتى شعاع لبريق
أفكر أهاجر أحسِّن وضعى أروى عطشى أبل الريــق
دافع تمن السفر ديــــون أرجع مترحل جثة غريـــق
أفكر أهاجر أروح اتهرب حاسس إنى عايش متغـرب
وكل مابحضن فيكى اتقرب بتقسى ألاقى الحب اتسرب
خدعونى قالواإيطاليا جنة رحت مجازف أنا ومجـرب
مراكب مافيا والموج عالى شفت الموت ونهبوا مالى
أنت ياوطن الأمل الغالـــى أنت أبويا وعمى وخالـــــى
ليه بتقسى عليَّا كتــــــير؟ عايز نظرة عطف لحالــــى
خلينى أعيش وياك متهنى يا تقولى سفيرنا هناك مستنى
جوازى معايا باسمك أغنى هجرة سليمة بتخطيط فنى
أكسب رزقى أتمنى أرجعلك وألاقى حلمى معاك اكتمل
