د.عبد الله المغربى يكتب: دول باعوا البلد يا بيه

السبت، 18 سبتمبر 2010 10:32 ص

محدش يقدر ينكر
وكلنا لازم نستنكر
بعد الشعب م اتسطل
و الكل ف حالة هطل
وعملولنا للفقر أبونيه
دول باعوا البلد يا بيه
----------------
عصابة و اتلموا علينا
غموا عيونا و ربطوا إيدينا
حطوا إيديهم ع الأرض
وأخدوا عليها مليون قرض
واشتروا المتر بربع جنيه
دول باعوا البلد يا بيه
----------------
طول الوقت كهربا مقطوعة
و الناس مرارتها مفقوعة
طافحينها بالسم الهارى
و يبلعوا بمية مجارى
و هما بيفطروا الباتيه
دول باعوا البلد يا بيه
----------------
كلام ف كلام طول الوقت
خلاص من كده أنا زهقت
لازم كلنا نعمل حاجة
البلد دي لينا محتاجة
ليه ساكتين كل ده ليه؟
دول باعوا البلد يا بيه
----------------