انزف دمعك وابكى يا فـــان
دا احنا الفن معانا اتهــان
لمَّا تراثنا يضيع من إيــــدنا
عار وفضيحة ف كل مكان
فين الكاميرا تراقب ترصد؟
فين إنذار بجرس رنـــان؟
فين الحارس يرعى العهدة؟
يمكن غايب كان نعســــان
ولا دى حاجة مش مفهومة؟
أسرار عفاريت وحركة جان
افتح مندل تلقى مكانهـــــا
واسأل عنها قارئ فنجان
زهرة خشخاش تجيب ملايين
سرقها يا سيدى عاشق ولهان
قالوا اتسرقت مرة ورجعت
يبقى هتظهر تانى وتبــان
ولا سرقها حرامى متمكن
دارس وفاهم وضع مكان
فاهم إمتى إزاى هينفــــــذ
واحنا ف غفلة مع التوهان
خايفين بكرا يشيلوا هرمنا
وبرج الجيزة يصبح كـــان
متاحفنا مش قادرين نحميها
يبقى النيل إزاى يتصان؟!
يمكن نلقى الميه اتشفطت
مواسير سرية تروح خزان
وامكن ياخدوا كحل عيونا
سرقوا الفرحة سابوا الأحزان
مش عارفين الزهرة نصونها
يبقى إزاى هنصون بستان
لما تراثنا معانا يتبهــــــدل
يبقى اختل حقيقى ميــزان
صونوا تراثنا بشكل مقدس
دا احنا حاضرنا يجيب نسيان
انزف دمعك وابكى يافـــان
دا احنا الفن معانا اتهـــان
مشاركة
اضف تعليقاً واقرأ تعليقات القراء
مشاركة
