رأفت محمد رمضان يكتب: دنيا

أحلى صبح ف عمرى
يوم ماشفتك ياملاكى
صبح شمسه غير كل يوم
كنت بتمناه يدوم
شفت فيه أجمل عيون
آه من جمالها ولا الجفون
أجمل عيون ف الكون
اتمنيت ساعتها أكلمك
أسالك إنتى مين ؟
وامشى لطريقك فين ؟
معقول
نظرة واحدة من عنيكِ
تغيرنى تحيرنى تخلينى هايم
وأنا صاحى وأنا نايم
مش أقادر من ساعتها أنسى
أحلى لحظة عاشها قلبى
لما جيتى قعدتى جنبى
قادت ساعتها ف جسمى نار
كنت بتمنى الفرار
كان منايا الطريق معاكِ ماينتهيش
وأفضل أتكلم وتسمعينى ولا تمليش
لحد ما يوصلك قد أيه حبيتك من نظرة واحدة
وإنتى ماكنتيش رحيمة وخدتينى واحدة واحدة
معقول أقابلك مرة واحدة من يومين
أدوب معاهم ف الشفايف والعينين
ولا صوت الملايكة لما بتتكلمى
سمعتك مرة واحدة وأنتِ بتسلمى
كنتِ زى نسمة هوا وأنا العليل
ياللى معاكِ الدوا
إسمحيلى أقول لك كلام لغيرك ماقلتهوش
أنا الحب قبلك بجد معرفتوش
ولا حسيته ولا فهمتوش
كل اللى قبلك كان سراب كان خيال
وأنتى الحقيقة الوحيدة أنتى معنى للجمال
وأنتى الإنسانة اللى قلبى ليها مال
لكن رغم حبى ليكِ القرب منك محال