راضى على حسين يكتب: لو عايز تعيش

حطم يأسك
فوق صخرة أملك
انسف جبل الهم القاعد
على صدرك
دمر خط العودة لجبنك
احرق حزنك
برماد الفرح الموجود فيك
انسى ماضيك
لو كان سلبى
خلـِّيه مدفون ف أكفان النسيان
خلى جروحه بعيد متجيش
ارسم هدفك قدام عزمك
اغسل جوفك من كل الأوهام
طلع خوفك
لو كان عشش فى الأحلام
لازم تمحى الاستسلام
زى الطير بينبت ريش
اقطف عناقيد الهم
المرسومة تكاعيب فوق وشك
انفض كل تراب الشر
المتشعبط فيك
سيب الضحكة تطير وترفرف
سيبها تهز الروح وتكركر
ليه تحبسها يا سيدى ف سجنك
لو تاهت منك تانى مفيش
قاوم أسد الفشل اللابد جواك
اطلق كل خيول الحب
المربوطة بحبال حقدك
خليها تغوص ف بحر هواك
توصل كل الأعماق
تكشف كل كنوز السحر
هتلاقى ترياق عمره ما يأذيك
من كل الأمراض يداويك
فضفض إياك تتألم وماتشكيش
محتاج لحبيب صافى يعزيك
بدافع الهمة يجى يغذيك
افرد للفرحة جناحك
ازرع وردة لكل نجاحك
وافتح للبسمة الشبابيك
أوعى تقفل باب أو شيش
لو عايز تعيش
قص ضوافر طمعك
امسح للغلبان دموع
واخلص عملك
ازقى الخير يربى فروع
يطرح أملك
يبقى شموع
تنور كل طريق وياك
زى نجوم الشمس وأكتر
تدبح ضلمة تموت خفافيش
خليك زى الطفل برئ
بيسامح الكل بقلب جرئ
بينسى القسوة يحب الكسوة
يرقص سامبا على المزازييك
يحب يغنى لابس طرابيش
وبيخدع نفسة بكل براءة
مين فى الدنيا يا سيدى زييك
لمّا الفرحة تغنى معاك
تستناك
لما تشوفك تيجى تتمخطر
وتاخدك بالحضن لبر أمان
تنادى عليك
تحس معاها بطعم حنان
وتلاقى نفسك بتحب الدنيا وعايز تعيش