محمد فرج على يكتب: تستاهل مش كدة

فى يوم من الأيام كنت باشيت على الياهو وتعرفت على بنت من صعيد مصر العامر بالخيرات وكان كلامها منمق واسلوبها لذيذ فى الكتابة "حاجه غريبه" مش كده!! و ده اللى خلانى اشتاق لسماع صوتها وسمعت صوتها بعد الحاح و كان يا عينى عليه فى رقته ودلاله تقولش بلبل بيغرد ما فيش احسن من كده.
طلبت منها تفتح الكاميرا عشان اعرف شكلها اللى اكيد حيبقى ذى صوتها ما فيش احسن من كده 3 شهور وكوكتيل حجج من عينة "ما عنديش كاميرا فى البيت" "السايبر اللى انا فيه ما فيهوش كاميرات" " باشيت من عند واحده صاحبتى"، وبدأت أشك فى الموضوع طب وبعدين قالت لى ما تزعلش حابعت لك صورتى وبدأت توصف نفسها و قالت بالحرف الواحد "شعرى شعر شريهان -ربنا يشفيها - و عيونى عيون حنان ترك بالملى ومناخيرى مناخير سعاد حسنى وبقى بق بوسى بالظبط !! و استعديت للمفاجآه ايه ما بعتيش صورتك ليه حا بعتها على الايميل اوكى استنى وكل يوم افتح الايميل و مافيش حاجه وفى يوم لقيت رسالة عنوانها "عروسه لُقطه" اى والله لسه بافتحها بسم الله الرحمن الرحيم بعيد عنكوا وعن السامعين وعينكوا ما تشوف إلا النور صورتها تقول للبت ظريفة بتاع ترويض الشرسة ربنا يخليها لنا قومى وأنا اقعد مكانك وبعت الرد على السريع "انا موافق اتجوزك بشرط انك تقطمى رقبتك جتك قطم رقبتك" تستاهل مش كده.