هيثم عبد الشافى يكتب: صف أموات

يووووه...!
جيت أتوه
لمتنا البلاد
يوووه...
لسه قلبك الجرح فيه ينفد ع أخوه
ولا أتوه؟
مع أن كفوفنا عضم
عرقين وريحة اللحم
ليكى ريحة وطعم
ليكى شوق المتغرب
لداره والطينات
من غير آهات
هاتى ف كم الجلابية بكاكى
لا مين جابك ولا مين وداكى
مستمناش.. آجى ويا الغيبة ع قلبك
قالو وقالو عنك
قالو سيرتك لفت سبع بلدان
بالأمارة وكمان
صاحبتى نساوين العديد
وبقيتى رايحة جاية كل الموت
قالو ورا أى مروح
كان يرفرف منديلك وينفرد
وأكوام ظلط
تحت صفصافة المقام
دور ترصى ودور تهديها
مين قالك أيديكِ تراب الفرن يحنيها
وأرجع تانى أغنيها
أنا مش غلطان
مع إن إنتى اللى كان
كل ألحان بليغ ف صوتك
طبطبتى ع ضهرى وقولتى أفوتك
حطيتى ضهرك ف ضهر الباب
وقولتى روح
حس الناى حلو لوجع القلب
من ساعتها تشيلنى بلاد وبلاد تحط
قوليلى بأى وش كنت أرد
يووووه...!
أنا بعت الناى
وبحقه جبت
قماشات..
يوووه...!
جيت أتوه
ف يوم واحد رقدنا
بينى وبينك
صف أموات...