ما أنتِ عارفة أنى فلاح
لا أنا سفير
ولا وزير
ولا طير بجناح
حلمى على قدى
تودينى قد ودى
ونغنى للصباح
ما أنت عارفة أنى فلاح
ماليش غير يدى
اكل من عرقها
وأصون وعد جدى
أنى أموت
ولا أفوت أرضى
أرضى اللى بحبك قدها
وبتحبك قدى
آه يا أم قلب طايش
لو تحب الأرض ترضى
وعمرك ما تقولى امتى
وعمرك ما ف يوم تعاندى
ما أنتِ عارفة أنى فلاح
وأنى بحب الزراعة والميه
وأنى لو أطول أسقى أرضى من عينى
وأنا بحبك صحيح
بس ماليش إلا هى
وإن كان لى خير فيكى
ف الخير أصله هى
يبقى ما تزعليش
أما أسهر ليالى فيها
وأحكى فيها شوية
ده اللى يفوت أرضه
يفوت عرضه
ويعيش من غير قضية
يا حبيبتى ده أجمل إحساس ف الدنيا
الواحد يرتاح فى ضلة أرضه
يأكل لقمة ويمسح عرقه
ويحكى لها عن غرامه وحبه
ويرسم فوق ترابها فرحه
يضحك طينها الطرى ويدعى له
يلاقى البركة طارحة ف عمره
ماليش غير الفاس والمقطف
لا عمرى أحايل الأيام
ولا مستنيها تعطف
اللى عاوزه باخده
واللى مش بطوله مش عاوزه
محدش بيعاند قدره
وينام مرتاح
ما أنتِ عارفة أنى فلاح
ودقت ياما جراح
من هنا حبة
ومن هناك حبة
وبفرح بزرع الحبة
وبستنى الحصاد
مش قولتك
كل شىء بمعاد
يبقى ليه الزعل عاد
وتقولى طريقنا طول
وأنا لسه حبك عمن أول
اصبرى قرب حبنا يطرح فرح
قرب يوم الحصاد
مشاركة
اضف تعليقاً واقرأ تعليقات القراء
مشاركة
لا توجد تعليقات على الخبر
تم أضافة تعليقك سوف يظهر بعد المراجعة