فيسبوك
واتساب
أنا إنسان
ف قلب الكون
بحب أعيش وأكون فـ براح
بكون مرتاح
وأخاصم دمعى
على عتبة رموش عينى
واحب الفرح
وافتحله .. دراعينى
وأنسى حزنى بالفرحة
وألضم .. عتمة الأيام
بنقطة نور
وأرسم رسمة الأحلام
بلون أبيض
بلون الماس
ومركب دهبى
على ضهره أعز الناس
حبيب قلبى
وأفردله .. شراعينى
وأدبل وردة الأحزان
بشوك بيموت
وشوق بيعيش
عشان وردة الفرحة
تعيش ما تموت
بكون .. مبسوط
وقلبى سعيد
وأواصل خطوتى بوقفة
كما لو هى وقفة .. عيد
وأكون .. إنسان
