يا مصر يا ام الطلة تسوى بلاد
ليه قسوتك بزيادة على الخلق والعباد
ليه كل ما امسك حفنة تسوى تراب
تستخسريها فى قبضة الأحباب
وتصهينى عن قبضة الأغراب
يا مصر بزيادة عصيرك مر
والعمر ما بين الأسى والذل بيمر
والحب لو ينكال بالجبل هيخر
على الجبهة تذكرينى كما السلاح حر
ولما انكتب نصرك منسى بقيت العمر
يا مصر يا ام الجرس بيحابى لحن اذان
ليه البشر اتفرقوا وكل يد فى حال
مين يسندك فى الشدة وقت البشر تتهان
ويمشط الشعر الحرير على ضفاف ليلك
احترت انا وياكى والظلم طول نيلك
يا مصر يا ام الحضارة بالألف والألافات
ليه فى التاريخ ما عدش ليكى كتاب
مركونة على الرف ومعفر جبينك
وعلى رصيف نيلك مرصوصة دى الآفات
ما عادش حد بيقرا ولا زمانك فات
يا مصر يا ام الرجال شقيانة فى السخرة
على دروب الهم مغروسة كالخيالات
نحت الزمن على الوشوش علامات
خايف فى يوم اسمك ما يبقالوش ديه
اهلك يا غالية بيغمسوا الرغيف بفتات
يا مصر يا ام الدلال على الأهل والخلان
لو تفتحى صدرى تلقى النشيد جواه
والرايه مغروسة فى القلب لو قتلاه
متزعليش من قسوة حرف مكتوب لك
دى القسوة خلف القلب والحب موهوب لك
يا مصر وقت الخطر شاورى بصابعك
تلقى الرجال دابابان مرصوصة فى ربوعك
وعلى السلاح الكتف صلبة كما دراعك
نرويكى بالدم ماهو دمنا بتاعك
يمكن فى يوم تشعرى ان عندنا دم
مشاركة
اضف تعليقاً واقرأ تعليقات القراء
مشاركة
