فيسبوك
واتساب
عمود نور
بينوّر فـ عز الضملة.. مش شايف
ومش عارف
ينور إيه ؟!
وبيعافر
كأنه قطر.. ومسافر
ومش عارف.. طريقه إيه ؟!
عمود نور
فـ عز البرد بيعانى
عشان أسلاكه عريانه
ومش زعلان.. عشان عريان
لكن زعلان
عشان
مش لاقى يتغطى
فـ عز البرد
يبيع الورد
لكنه عمره ما يشمه
شايل همه
يقول.. إزاى ؟!!
حتفضل يا عمود واقف
تطلع نور
ومن جواك
ظلام الفقر بيطاردك
وييحاصرك
بقيت.. مقهور
ووسط الناس
لكنك بيت فضا مهجور
وبتحاول تدارى الحزن بالضحكة
ومش عارف بتضحك ليه ؟!
لكن
مهما عواصف الضلمة حتتحداك
حتنور
ومش حتمل
ولو قطعوا السلوك عنك
ماهوش حل
عشان لو حتى مات النور
حتفضل يا عمود واقف
عمود نور
صورة أرشيفية
