هناء المداح تكتب: كله انكشف وبان

تعبت يا ناس قولوا لى.. فينه راح الفنان؟..

اللى يقول أحلى كلمة.. ويدوّر ع الألحان..

فين الأدب ده فينه.. فين حرمة الإنسان!..

رقص وبنات عرايا.. إيه الناقص كمان؟!..

هيحصل إيه زيادة؟.. كله انكشف وبان!..

فيديو كليبات خليعة.. بتأثر ع الشبان..

قلبت أفكار بريئة.. وحطمت اللى كان..

وده كله عشان فلوس!.. يحصل كل القلبان؟!..

هرب طفش الحياء.. طبعاً لازم زعلان..

واحد يطلع يولول.. كأنه ما له لسان!..

بنات طالعة تتنطط.. تقولش عفاريت جان؟!..

ما بقاش فيه ذوق يا ربى.. وباظت الوِدان..

اللى بيقبّح أكثر.. بيكون هو الكسبان..

خليتو شباب اليوم.. مع الدش أهو هيمان..

ما عليه غير إنه ياكل.. ويطرقع باللبان!..

ولا قادر يعمل حاجة.. تعبان دايماً كسلان..

يا رب ارحم عبيدك.. ارحمنا يا رحمان..

كلام حبيت أقوله.. وهو حان الوقت حان..