عصام شلتوت
مشهد غريب ومتكرر أصبح "يتمه" بلغة أهل السينما أو "لزمة" بتعبير سينمائى أدق مع حسام البدرى ألا وهو أن يبدو عبوثا ومكشرا وطول الوقت يوجه اتهامات للاعبين.. الكاميرات ترصدها فى حركات شفايف المدير الفنى الأحمر!
نعرف أن الجماهير الأهلاوية ممكن أو طبيعى أنها تكون زعلانة ومتنكدة بسبب أداء لاعبيها الهزيل من فترة طويلة.. أو عرض مستمر.. فالجماهير الحمراء أصبحت تشعر أن هناك لاعبين مفروضين على الفريق مهما كان مستواهم أو سنهم!
الحقيقة الجماهير لها حق، لأنها لم تتخيل فريقها والشيخوخة تنال منه.. لأ.. واللى يقول كدا، يكون عرضة للتهكم والسخرية مع أول هدف يحرزه النجوم الحمر الكبار سنا!
لحد دلوقت وكله طبيعى.. إنما تكشيرة البدرى وعبوسه.. واستهجانه مستوى لاعبيه بتمتمته.. أو بهمس الشفايف هو اللى مش عارفين ليه سبب واضح.. يا كابتن؟!
أنت وحدك تضع التشكيل وتختار اللاعبين.. ولن نسألك ليه اخترت غدار.. أو فرنسيس.. أو لماذا لم تختر العراقى الدولى جدا عماد محمد مثلا.. ربما مسألة فكر سياسى؟!
لكن غير المحتمل يا كابتن حسام هو حالة الغضب اللى بتنتابك بعد بداية كل مباراة وشكواك المتكررة لجارك فى الدكة هادى جدا خشبة، كمان مش عارفين ليه الولد الشقى محمد طلعت ما بيلعبش.. وليه حسام عاشور حاجز مكان دائم بدون أى أمارة، اللهم إلا حكاية لاعب دمث هادئ.. اللى هى مالهاش دعوة بالاحتراف خالص!
وبما أنى نويت أتكلم مع الصديق العزيز حسام البدرى بكل صراحة فبالمرة لازم أقول له حاجات تانية زى أن الأهلى محتاج مهاجم الترا سوبر.. إلى أن يعود عماد متعب، وكمان عايز أقول له.. إذاى متعب نزل الملعب وهو برا التشكيل والنادى و" أخد "الشو من النجوم، وأنت عارف إن دى حاجة مهمة عند النجوم طبعا مش كدا؟!
حاجات كتير يا كابتن مش أنا بس اللى عايز أتكلم معاك فيها دا كل الجماهير تقريبا.. بس أنت بتزعل قوى.. مش عارف ليه مع أنك عارف أن الناس بتحبك لأنك شخص جاد ومخلص.
باقى الأسئلة محتاجة قاعدة مفتوحة، لكن الحمد لله أن الأهلى لسه فى البطولة، بس لازم تعرف إن اللى جاى خطر.. ومش كل مرة ها تسلم الفرقة.
آه.. هو فين عفروتو.. وشكرى.. وسعد الدين سمير.. ومش هقول غيرهم.. بس عايز أفكرك أنك بدأت نجوميتك لما مستر هيديكوتى اختارك فى سن الـ18 علشان تلعب على نجوم، شاف المرحوم كوتى أنهم كبروا فى السن، ودى حاجة مش بأيديهم.
كابتن حسام لو حسبتها صح ولا هتكشر.. ولا هتزعل.. وكل شىء هيكون تمام.
