مسحرااااااتى..
أبدأ صلاتى وسلامى
ع الهاشمى التهامى
له م الأسامى أسامى
لسه ما نعرفهاش
ما بين تلتمية وألف إلا ميَّة
ويجرى فـ دمانا وفى القلب عاش
محمد وأحمد وصادق صدوق
وعاقب مقفَّى وقاسم ضحوك
وهز العروش اللى تحت الملوك
فبانت عظمته فى غزوة تبوك
وربك كفى المؤمنين القتال
اصحى يا سامى يا عمدة وجلال
وصحوا صفية ورامى ودلال
أنا لو عليَّا ما ابطلش انادى
وأفضل أغنى ورقصى حلال
صياد سمك قلبى توكَّل
على صاحب الرزق العلام
اللى بيُمهل ولا يهمل
وعنيه لا تغفل ولا بتنام
صياد سمك ما اعرفش شطوط
على رزقى انا دايماً سارح
ومركبى ع الموج مربوط
ما اعرفش بكرة من امبارح
بين العواصف والنوَّات
أنا والقمر والصبر اخوات
بنصلى ونسبَّح أوراد
فى البحر ياما سهول ورياض
صياد سمك واصطدت بياض
واصطدت بلطى مع مرجان
أم الخلول على جاندوفلى
ما تمد إيدك واقطفلى
من الشجر فراشات ألوان
من الشجر أسماك زينة
على تمر هندى فسيخ شربات
خياشيم تزهَّر تحت الباط
بواريك براقع وإيشاربات
مناديل ورق تستنى عياط
وبنات بتمشى على الميَّه
وقلبى على طراطيف رجليه
بيغنى شوق على حنيَّة
ويسيب صوابعه لقشر البيض
والعسكرى يحبل ويحيض
عشان يلبسنى قضيَّة
فيها قلبى ماشى بعكس السير
مع إن قلبى بيتوكل
على صاحب الرزق العلام
اللى بيمهل ولا يهمل
وعنيه لا تغفل ولا بتنام
مسحرااااااتى..
مسحرااااااتى..
مسحرااااااتى.
