فيسبوك
واتساب
الريس (أحمد عبد العال)
ريس المحطه
قبل ما ينوى
بست ساعات
قطع الكهارب
عن بلدنا
دار بنفسه كل الجوامع
وقال..
يا أهل البلد
كل حى
يعمر لنضو
اللى ناقصه عويل
أو قزازة
يجينى أرخص من أى حد
أبيع له
وبكعب بوص
ملفوف عليه شراب
خليت القزازة ولا البنور
م المغربيه
قفلنا الباب
حكمت رأيى أبو نار زرقه
إلا وإلا يدور
أصل يعجبنى حسه وصفار النحاس
بإيديا حضرته
ادى نفس وادى كباس
قبل ما يفضى الغاز
بالإبرة فشيته
كتاب القراءة..
جار أبويا قريته
واتنين مربوطه ف اتنين
كان صعب أرسمها
ستى قالت حرف عين
لليوم فاكرها
الراديو أبو شنطه جلد
ف حجر أمى
حجرين جداد وعليهم القط
طول الليل شاعر الربابه يغنى
ع الحيط شفت روحى أكبر منى
ضل أيادى أبويا
ع الحيط
وعملها سمكه
دى وزة
دى يمامه
خدنا البنادق ورحنا الغابه
وساعتها كان يقول أنا راجل
مين يخطى العتبه؟
ويجيب مقام الشيخ
حفن الطبيخ
ع ضى اللنضه اتعشينا
كانت الخلايق تدعى ييجى النور
ما دعينا
وبعد العشا تغنى ستى
نرد عليها
كانت نومتى ف حجرها
وأعز دب ايديها
من ساعتها وعليها
جه النور
خد أحمد عبد العال
وكل اللى حضروا غابوا
ضى الكهارب طال
حتى أبو نار زرقه
محروق ف قعره غازو
