حمادة الشريف يكتب: المنفسنين بينفسنوا وإحنا معاهم

حسين وعبده ومصطفى التلاتة بكالوريوس تجارة عاطلين والحمد لله بيتجمعوا على أحد المقاهى بعد الانتهاء من صلاة التراويح ودار بينهم الحديث التالى:

حسين : شوفتوا ياض إنت وهو التلفزيون المصرى .. جايب كله حصرى .. ههههههه
مصطفى : قصدك إيه يا وااااد
عبده : ياعم يقصد مسلسلات رمضان ... هما صحيح 85 مسلسل يا واد ياسحس
حسين : بالسيت كوم ولا من غير .. هههههههه ... أه يا سيدى 85 مسلسل تقريباً والعهدة على الراوى .

مصطفى : ده تلاقيهم إتكلفوا شيء وشويات ... يعنى يجى 5 أو 6 مليون جنيه ولا حاجة ..!!
عبده : قوم يا مصطفى من هنا .. أنا قولتلك يا عم حسين مش عاوزين أطفال معانا فى القعده .. يا مصطفى أنا سمعت إن أجر الدكتور يحيى الفخرانى لوحده 5 مليون جنيه والنجمة إلهام شاهين يجى 4 مليون جنيه و .. و.. و... إلخ شوف إنت بقى فيه كام نجم السنة دى فى الـ 85 مسلسل .

حسين : يعنى الممثل فى 30 حلقة يأخدله يجى 5 أو 4 مليون جنيه ...!!! .. يا محظوظين يا معديين .. هتروحوا من ربنا فييييييييييييين .... ماتيجى ياض إنت وهو نروح نقدم فى معهد التمثيل بدل ما إحنا قاعدين عاطلين كده ... وأهو نفيد الدراما المصرية بكام نابغة جديدة .. علشان نجدد دماء الدراما

مصطفى : يعنى تكلفة المسلسلات دى كام كده يا عم المحاسب إنت وهو ..؟
حسين : تقدر تقول كده يادرش لو عملنا متوسط للمسلسل 4 مليون جنيه وخليها من ناحيتنا شوية .. يبقى (4 × 85 = 340 مليون جنيه) وده طبعا من ناحيتنا شوية هو ممكن يكون ضعف الرقم ده .

مصطفى : يا حلاوة يا ولاد .. طيب لما هى الدنيا مزهزة كده وفيه فلوس ... أمال كل شويتين يطلعلنا وزير المالية يقولك مفيش فلوس مفيش فلوس .. والموازنة عاوزة تتوزن ... طيب هى فلوس المسلسلات دى برة الميزان ياسيدى الوزير .

عبده : بس شوف يا أخى بعد المصاريف دى كلها .. تحس إن وزير الكهرباء مش راضى على الوضع ده وكان محتاج الفلوس دى يعمل بيهم محطة كهرباء جديدة والناس ماوافقتش على طلباته .. قام جاى ضربلهم كرسى فى الكلوب وقاطع الكهرباء فى رمضان .. ومفيش حد عارف يتابع حاجة يا ولداه ...

مصطفى : أصل ربك بيسلط أبدان على أبدان ........ وإنطلق الثلاثة فى ضحك هيستيرى ومن داخلهم جملة وحيدة ... (صحيح شر البلية ما يضحك)