أحمد خيرى يكتب: لقمتك من فاسك.. كلمتك من راسك

حاولت أن أكتب ليلا حتى لا أجرح صيامى ولكنى أعود متأخرا من عملى والآن أكتب وداخلى شعور بالذنب لا أريد أن أذكر أحدا فى غيابه سواء بالخير أو الشر، فأدعو الله أن يسامحنى عن فكرة ما أكتب فقد سيطرت الفكرة على رأسى منذ أيام قليلة بعد مشاهدة برنامج استضاف منتجا وممثلا مشهورا.


وأعلن حضرته أن ممثلة تقاضت ستة ملايين جنيه عن مسلسل حدف بحر وبعدها طار عقلى ليس حسدا ولا حقدا ولا اندهاشا من السفاهة فى الإسراف والهطل فى البعزقة وأتمنى أن أكون موفقا فى حساباتى المسلسل بفرض أنه ٣٠ حلقة وكل حلقة ساعة منها ربع ساعة إعلانات والممثلة ظهرت وأبدعت نصف الحلقة أى ٢٢ دقيقة ونص قول تلت ساعة أى حصلت على ٢٠٠٠٠٠ جنيه فى الحلقة أى عشرة آلاف جنيه فى الدقيقة..

انسى الحقد والغل إحنا فى رمضان وإنسى حالى وحالك وحال الكثيريين وإنسى أبله سعديه مدرسة المواد الاجتماعية التى تذهب لمدرستها من محافظه لأخرى بالقطار وتعود بعد الرابعة محملة بكل أنواع المعاناة من صحيان فجرا وإعداد الإفطار للزوج والأولاد وتوصل الصغار للمدرسة ثم تنطلق مهرولة إلى الميكروباص لتوصيلها لمحطة القطار وبعدها أتوبيس للوصول للمدرسة معرضة نفسها لكل ما يخطر على بالك أثناء رحلتها اليومية مقابل قول ٣٥٠ جنيها فى الشهر معايا.. إنسى كل القصص إحنا فى رمضان..

احسب معى مرة أخرى.. تكلفة زراعة فدان القمح ٢٠٠٠ جنيه وإنتاجية الفدان قول ٢٥ إردبا ده لو فدان دكر وإردب القمح يساوى ١٥٠ كيلو يعنى الفدان ينتج تقريبا ٣٧٥٠ كيلو قمحا، بالعربى كده أجر الممثلة فى المسلسل يساوى إصلاح ٣٠٠٠ .تلاثه آلاف. فدان قمح بإنتاجية ٧٥ ألف إردب يعنى ١١ مليون كيلو بعد الفاقد والهدر والنهب.. ده إيه ممثلة واحدة تخيل حضرتك فى ممثل بياخد ١١ مليونا عن الفيلم وباعتراف المنتج أنه مستعد أن يدفع لعمر دياب خمسين مليون للفيلم ومائة للمسلسل..

وإنسى كمان مكاسب رجال الأعمال اللى أكبر من كده وإنسى كمان مقدار زكاة أصحاب المصانع والمزارع والمستوردين والمصدرين وأصحاب الشاليهات والقرى السياحية وأصحاب الهامر وحياة النعمة العريقة ليس حسدا ولا حقدا قول تخاريف صيام تخيل حضرتك كل الموارد دى وبدأت حملة كبيرة من الدولة هدفها إنتاج القمح وشارك فيها الكل بجدية وتقضى على البطالة وتوفر لقمتك.. ممكن تقول محتاج لمياه أقولك السعودية زرعته واكتفت وصدرت على مياه المطر وهناك طرق رى حديثه موفرة.. ولو النية والجدية والإخلاص موجود ما فيش مستحيل تقول لى هناك اتفاقات بالتخلص من مياه الصرف فى البحر وعدم استخدامها فى الزراعة أقولك غلطتك.. تقولى كل وزارة فى وادى وكل وزير بيغنى على ليلاه.

والكهربا منفسن من البترول ورئس الوزراء فى إجازة وتضارب وتضاد فى التصريحات والحقائق طبيعى لأن النور مقطوع بس عجيب شعبنا بيشوف فى الضلمة مهما حاول البعض إخفاء الحقيقة والإشاعات دايما بيكون فيها جزء منور إشاعة انقطاع الكهرباء لتمرير قانون المحطة النووية..

إشاعه خليها إشاعة وهاودنى تصدير الغاز لإسرائيل هو سبب انقطاع الكهربا.. إشاعة أمريكا لعبت فى الجو وحرقت محاصيل روسيا علشان تكون المصدر الوحيد وتجوعنا.. خليك صاحى شوية روسيا عملت إيه منعت تصدير القمح علشان عندها أزمة إحنا بقى الطبيعى نمنع تصدير الغاز علشان عندنا أزمة هتقولى إنى بخرف ما أنا قلت لحضرتك تخاريف صيام وروسيا تقدر وإحنا .لا. أقول لحضرتك ليه روسيا بتنتج وما تورطتش فى اتفاقات يعنى لقمتها من فاسها وكلمتها من راسها.. أحلى حاجه إن لوحة الخشخاش تمنها ٥٠ مليون دولار إضراب بقى فى سعر الجنيه وشوف هتصلح كام فدان قمح وتنتج قد إيه وأملا الشوارع والحارات قمح وغنى يا مطرة رخى رخى قمح وبليلة على قرعه بنت اختي.. وده طبعا بعد إصدار بيان بأن الجريمة فردية والمتهم الماس الكهربائى.