شعر: مصطفى الجارحى
مسحرااااااتى..
بعد الصلا على سيدى
صاحب القلب الكبير
اللى أنا بـ حُبه أسير
واهتدى بيه واقتدى
حتى لو فى الضلمة أسير
الحبيب لما تجلى
فى المنام القلب صلى
إذ تيمَّن يستجير
اصحى يا تيسير صيامك
يبتدى بعد السحور
اصحى يا مختار.. يا نور
قصتى بين السطور
خدها عبرة للحياة..
بالزجل على وزن بيرم
فيها ذكرى وفيها آآآآه
رحت يوم أخطب فتاة
شفتها مرة فتاة..
عقلى فيها بنظرة أولى
صاحبى سيد قال لى ياااااه
يا إبراهيم دى بت حوله
قلت له لكن رجولة
هاعمل إيه بس بعينيها
بت فرد وطول وعرض
رحت بيتها وشلت ورد
وزَّعوه ساعة بطولة
كان فريق الأهلى فيها
ضد فرقة إفريقية
كانت الجماهير مهولة
والعدد مالهش حصر
يقولوا أهلى.. تحيا مصر
يهتفوا بنشيد بلادى
وإحنا شايلين ع الأيادى
ييجى طن زهور وورد
زبالين والدنيا برد
................
رحت وطلعت السلالم
فين يا ابنى الحاج سالم
شقته فى أنهى دور
بص لى من فوق لتحت
والعيون بتقول لى غور
ع السطوح ارحمنى يا اسطى..
سابنى وانا عندى زُغطَّة
الزبالة ف كل بسطة
حتى طالة من المناور
فى الصفايح ألف قطة
من بعيد ندهت لى "بطة"
واقفة عند الباب تشاور
بس بتنفض كليم..
بص أبوها وقال لى عندك
أوعى تطلع يا بهيم
حلفت بالله العظيم
إن أنا اسمى إبراهيم
قال لى خطوة تلاقى نفسك
رحت على أقرب حكيم
يالاَّ يا زبال فارقنا
ليك طريق ماهوش طريقنا
قلت له زبال صحيح
وأنت يابا الحاج إيح
بلَّها واشربها يالاَّ
بكرة هتبور الحريم.
مسحرااااااتى..
مسحرااااااتى..
مسحرااااااتى.
موضوعات متعلقة..
مسحراتى اليوم السابع "المطبعجى"
مسحراتى اليوم السابع.. (الفران)
المسحراتى "أخرس" فى المنيا
مسحراتى اليوم السابع.. الهتيف
مسحراتى اليوم السابع .. فى المحكمة
مسحراتى اليوم السابع.. "الفوانيسى"
مسحراتى اليوم السابع "الشهيد"
مسحراتى اليوم السابع.. "تاكسجى وتاكسى"
مسحراتى اليوم السابع "التلميذ"
مسحراتى اليوم السابع "الصحفى"
مسحراتى اليوم السابع .. "العربجى"
مسحراتى اليوم السابع.. "الشاعر"
تم أضافة تعليقك سوف يظهر بعد المراجعة