نشرت مجموعة على الفيس بوك وصل عددها إلى 1000 مشترك قصيدة شعرية احتفالا بالذكرى السنوية الأولى للنبوءة الكاذبة والتى كانت تدعى أن البابا شنودة الثالث سيفارق الحياة فى عيد العذراء العام الماضى، وتحمل القصيدة عنوان "باحلم بالكرسى" وتقول القصيدة:
باحلم بالكرسى
والكرسى عالى
قوايمه فضة
وضهره من الدهب الغالى
وتحته أسد رابض
وأنا فقير حالى
قالوا هات جواب من الوالى
لا الوالى نفع
ولا سهر الليالى
ولا اللى دفع
وقال اشتريه بمالى
ازاى تملا العين
وانت يا عينى خالى..
باحلم بالكرسى
كرسى أبويا
ما أنا بلياتشو
ملون وشى بشوية بويا
كده ابتسام
كده اهتمام
كده روحانية
يا سلام
وارجع أغرق فى الرؤى والأحلام
واحلم تانى بالكرسى
والكرسى فتنى
كل يوم
ياكل حتة منى
أبات أحلم
أصبح متهنى
الكرسى عمره ما كان بالتمنى
ولا للى مقضى حياته مستنى
الكرسى صليب كبير
خدها حكمة منى
باحلم بالكرسى
والكرسى ليه تاج
وأنا من زمان محتاج
أشوف الناس حواليا أفواج
وأنا ماسك العصايا العاج
وأعيش أيامى بالابتهاج
مسكين
الكرسى مش بالكرباج
باحلم بالكرسى
الكرسى واحشنى
بس اتمكن
وساعتها مين هيحوشنى
اقعد عليه يومين واموت
مش عاوز حد يدوشنى
انت فاكر هتكون مبسوط
ولا أحلامك هتهوشنى
دا اللى يقعد عليه لازم يكون مظبوط
يا إما ياخد عصاته ويمشى..
