مسحراتى..
بعد الصلا على سيد الكونين
الصادق الهادى الأمين
جات له الغزالة بضناها
تمنع دموع الحُسين
اصحى يا محسن يا زين
يا سيدة وياسمين
وجب السحور يا رجب
صحِّى على وأمين.
.................
الدنيا حر ورطوبة
يعنى عز الصيف
لا ضل نافع ولا
مروحة وتكييف
وأنا مهنتى فران
حتى فـ نهار رمضان
بارمى فى طاقة نار
قرص العجين خمران
يرد ليَّا رغيف
أحمر فى لون مرجان
يخطف عيون الضيف
..................
الصهد زى الرعد يلفحنى
وتبص تلمحنى
الضهر محنى.. لكنى عفى وسدَّاد
يقولو لى افطر يا واد
شغلتك صعبة
أقول ده رب العباد
بشَّرنى بالكعبة
أقول ده رب العباد
كافينى ميَّه وزاد
بشرنى بزيارة
يقولولى ولع سيجارة
رخصتك وياك
أضحك وعينى فـ آخر الزحمة
أسمع زعيق الخلق فى الحارة
اللى بيصرخ يا عالم
خلِّى فيه رحمة
واللى يقول الشمس حامية جبارة.
.................
وأنا فـ طابونة يوماتى
قول جهنم حمرا
عرقى يسيل فيضان
وشِّى كما الجمرة
تسأل عن الحر أقولك
أنا فران
تسأل عن البرد أقولك
ضعيف دبلان
اكمنهم لاتنين
جوايا متساويين.. مع إنهم ضدان
زى الضرير.. فى أى وقت يسير
ضلمة ونور يتساووا فى المشاوير..
ضلمة ونور عند الضرير سيان.
مسحرااااااتى..
مسحرااااااتى..
مسحرااااااتى.
