فيسبوك
واتساب
لو كنت مواطن حاف.. مش ممكن يوم تتشاف!
وهتفضل برة الملعب.. ولا هتحقق أهداف!
ولا يمكن تقدر تحلم.. ولو إتمنيت راح تندم
هيدوسك ابن الباشا.. ويكون أكبر هداف!
وهتفضل إنت بعيد.. نارك عمالة تزيد!
ما عليك إنك تتفرج.. وتشجع وية آلاف!
واقف مكسور الخاطر.. مش قادر حتى تخاطر!
ولا لاقى علاج لعيالك.. ولا حتى اللقمة الحاف!
لو كنت مواطن حاف.. مش راح تنعم بالمية!
معاناة ومرض وجفاف.. أحوالك كدة منسية!
دايماً هتكون ع الهامش.. آل يعنى كأنك عايش!
ولا حد هيسأل فيك.. ومشاكلك زى ما هية!
لو كنت مواطن حاف.. مش ممكن يوم تتشاف!
وهتفضل عايش ميت.. ده مصيرك إنت يا حاف!
