بعد ما فات للعمر قطار أولادنا كبروا وسابوا الدار
راحوا سابونا نعيش وحدينا دا الوحدة ف كبر السن مرار
وقالوا مصالحنا بجد كتير شغل وبيت وكمان مشوار
محدش فينا فاضى يراعى والكل بيهرب منا فـــــرار
وقالوا هنجيب ليكم خدامة تشوف طلباتكم ليل ونهــار
محدش راضى يخدنا معاه وبعد دراسة شافوا قــــرار
جوَّا دار رعاية سابونا نسيونا محدش لينـــــا زار
احنا قلوب محتاجة حنان مش محتاجة فلوس ودولار
نحس بطعم أمان فى الدنيا جنب عيالنا وهما كبــــار
لما ابنك يقسى علــيـك كل الحلم معاك ينهــــــــار
واللى يقول خلاص هيموتوا أمراض والعمر دا ليه أسرار
واللى ناسينا حتى ف عيد وعايز يقصف لينا أعمار
والى يقول الحمل تقـــيل والتانى واخدها يا سيدى هزار
أولاده ومراته يروح يتفسح واحنا فى سجن مالوش أسوار
واللى يقول قربنا نورث رصيد فى البنك وعزبة عمار
وبنت تقول جوزى وأولادى وقلوبهم قاسية علينا شرار
دا احنا لينا حقوقنا كتير رعاية زيادة واحنا كبــار
يا ما عطينا العمر بحاله يا ما سهرنا وشيلنا صغار
ليه رافضين تردوا جميل؟ ليه رافضين تكونوا أبرار؟
لمَّا الأب وأم اتهانــــــوا كل الدنيا هتبقى دمـــــــار
مشاركة
اضف تعليقاً واقرأ تعليقات القراء
مشاركة
