أحمد الفاتح يكتب: أسئلة بلا جواب

هوا بيعمل كدا ليه؟ تفتكر اللى حواليه هما إلى عاملين كدا؟.. طيب معقول مايكونش عارف إن بقالنا ٣٠ سنة فى حالة طوارئ؟ أو مايكونش عارف إن إحنا بنصدر غاز لإسرائيل بأقل من تمنه بكتير؟ طيب هوا لو عارف كدا؟ بيعمل كدا ليه؟ بينام إزاى وحوالى ٤٠٪ من الشعب مش لاقى ياكل؟ بينام إزاى والقدس بيحصل فيها كدا؟ بينام إزاى والقدس محتلة أصلاً؟ .. هوا مسلم صح؟ .. متأكد؟ هما مش كل إلى اسمهم محمد مسلمين؟ لا بس القضية مش قضية دين؟

طيب لو هوا مش عارف كل ده.. نعرفه إزاى طيب؟ حد يعرف نمرته؟ طيب لو اتصلت عالبيت هوا إلى هيرد عليا؟ طيب نروحلوا فين عشان نلاقيه ونكلموا؟ نعمل إيه عشان يحس بينا ويعرف؟ "ده إذا مكنش عارف".

ده جزء من الأسئلة اللى كانت لحد فترة معينة بتراودنى؟ وكنت خايف أتجنن عشان مش لاقى إجابة؟ وبعد تفكير عميق لقيت إن الأسئلة أبسط من كدا بكتير؟ كل الأسئلة دى تندرج تحت سؤالين اتنين بس وهما :

١ـ هل هو عارف وساكت؟ "مطنش؟".
2 ـ هل هو مش عارف واللى حواليه هما إلى عاملين كده؟ "مغيب".

والإجابة على السؤالين دول أنها مش فارقة..
لأن فى الحالتين.. هوا لم ولن يصلح لأن يكون الرئيس.. عشان عمر مصر بالذات ما كانت محتاجة رئيس يطنشنا أو رئيس يكون مش دارى بينا.