قلبى ربابتى يا مصر
وحبك حب العذراء البتول
ياما على سكك الهوى بنقول
قلنا فى حبك وياما حنقول
لايهمك إسرائيل ولاحتى المغول
محبة من القلب للقلب..
بينا للمحبة رسول
ساكن فى المدينة وحبى للأرياف
حافظ نعمها الشريفة والرغيف الحاف
غنيت لترابها عذابها..
حبها فرحتها..
غنيت بيبانها.. بحرها ترعتها..
غنيت شوارعها وحواريها حبتها بجد
وبكيت فرح وانحنيت قبلت صخر السد
أنا أصلى مصرى وعاشق بنت مصرية
على كل مكان أسافر زى العاصفة والريح
بصوتى أغنى لبلدى ولوحتى قلبى جريح
على صدرها الحنين أجلس وأستريح
أصلها أمى وعشقها بيخف المجاريح
أنا ماليش غيرها وعمرى ما أقول بخاف
فى عز.. عز الجفاف
أزمة عالمية وسنين عجاف
تمر بسلام وانت بتشدى اللحاف
اسمك جميل بكتبه على الغلاف
وأنت يا نفسى بصبابة
غنى واعزفى على الربابة
حتنتهى الأزمة زى الضبابة
وتمر بسرعة زى السرابة
خليك جرىء وفصيح
يا تغنى يا تعزف يا تقول تواشيح
فى محرابك أتعبد وأصلى التراويح
مصر الحبيبة يا شاعر تعشق أولادها
يغنوا ويرقصوا لها دايما فى أعيادها
ويحيوا الشهدا اللى ماتوا فى جهادها
أبطال رجعوا تحييهم
وفى حضنها بعطفها تدفيهم
بأرفع الأوسمة تهديهم
وبذاكرة البطولات تهنيهم
علم مصر
مشاركة
اضف تعليقاً واقرأ تعليقات القراء
مشاركة
