فيسبوك
واتساب
يا ورد دوبتِنا بألوانك الحلوة
تنشُر عبيرك وتعمِل مِ الغصون خلوة
يا ريت أبوسك وأهيم وأسرح ف بحر هواك
واكتب فى جمال خدودك تلتميت غنوة.
يا ورد بلغ حبيب القلب منى سلام
غايب وفايتنى ما بين جراح وآلام
ويا سلام لو يرجع مع الربيع حسنه
يزول همى ويصفالى الزمان يا سلام.
هل الربيع علينا وفْ إيديه وردة
صَحصَح قلوبنا إلى كانت فى الشِتا خُردة
نسهر ليالى بين الفن والأنغام
ونسمة الليل تِعدى عَ القلوب باردة
سَألت الوَرد لِيه الوَرد غَار مِنِك
مِن رِقِتِك وابتِسامتِك ولا مِن جَمَال سِنِّك
أصَالحِك على الوَرد وخَلينى لِوحْدى بِعيد
لا قَلبى ادْ هَواكى ولا كان سِنِّى مِن سِنِّك
يا وَرد إيه حَيَّرَك مُش رَاسِى على عُودَك
زَعْلان ويّا حَبيبك وِبتِخلِف لُه فِ وُعُودَك
دَمْع الفُراقْ والنَدَى سايِل على خَدَّك
وأمّا الحَبيب يِلمِسَك تحمر لُه خُدودَك
