فيسبوك
واتساب
لازم نعيش
رغم اليأس اللى معشعش فينا
والقمرالغايب عن ليالينا
والحزن اللى بينخر
جوا حطام القلب
لازم نعيش
رغم الكدب الباين على كل وشوش
الغدر
والخوف اللى حقيقى مالينا
رغم الغابة المليانة وحوش
رغم حبال القسوة المفتولة اللى بتخنق
كل الضحك
فى عيون طفل برئ
وسكين الغربة اللى بتدبح كل جرئ
وبتبعدنا عن بعضينا
وخناجر مسمومة
مغروزة ف شرايين الحب
لازم نعيش رغم الأشواك فى كل طريق
وحقيقة بتعيش فى الضلمة
مش لاقيه بريق
غرقانة فى بحر الأوهام
وبحر الطمع اللى عمينا
مش لاقية مراكب ولا مينا
مد فونة فى غيابات الجب
لازم نعيش
رغم الورالدبلان فى كل ربيع
وضميرنا الغفلان
ومبادئ بتضيع
واللحن الزعلان
مش راضى يعزف أغانينا
لازم نعيش
نزرع أمل فى بكرا الجاى
يطرح أشجار تحقق أمانينا
وجناح الفرحة المكسور
هيطيب ويكبر ويطلع ريش
ويرقص ويغنى ويصرخ
لازم نعيش
