محمد رمضان يكتب: هو فيه ايه ؟

هو فيه ايه يا جماعه؟مصر بقت مالها كده . لا دى مش مصر ابدا يبقى نقول شعب مصر بقى ماله كده.بيقت ابص فى كل مكان الاقى اشوف الامعقول عنف, قتل, ذبح, تمثيل بالقتيل,رشاوى ,محسوبيه,انتحار,اعلام مشوه.

المشكله كل ما اقول لا دى ازمه وهتعدى ومصر هتبقى بخير تانى أذ بى اتفأجا ان كل يوم بيمر بيكون اصعب من اللى قبله.شوف بقى يا سيدى حواليك العنف عامل ازاى كل يوم تسمع عن جريمة قتل اسوأ من اليوم اللى قبله وتلاقى دلوقتى صفحات الحوادث مبسوطه على الاخر والمشكله القتل بيكون بعنف شديد وبيطلع عين القتيل يا حول الله.طيب ما هو مات يا عم ارحمه بقى لا ازاى.تبص تلاقى الواحد من دول يقتل ويبهدل الضحيه بعد كده. زى ما سمعنا عن اللى قطع لسان الضحيه.واللى قطّع القتيل وحرقه.واللى قطّع القتيل ووزع جثته فى كذا مكان.فين القتل اللذيد-على رأى ابراهيم عيسى-.

والغريب و اصعب دلوقتى المجرمين مبقوش من اصحاب السوابق والبلطجيه زى زمان لا يا عم اشى مهندس واشى دكتور واشى واحد غلبان لا عمره كان يفكر فى يوم يدبح فرخه. دى مش حاجه تخوفك من اللى جنبك واللى ساكن قدامك .حتى اللى ماشى جنبك فى الشارع. يا ساتر استر.نيجى بقى للبلوه الكبيره برضه الرشاوى والمحسوبيه.تخيل ان فيه ناس كتير تزعل قوى لو لا سمح الله اتمنعت الرشاوى والمحسوبيه.

لا مش تزعل بس متعرفش تعمل حاجه يعنى مثلا لو مفيش رشاوى ومحسوبيه فى المرور عدد قليل جدا يستحق رخصه والباقى طبعا هيزعلوا .مع انهم والله بيزعلوا ناس كتير قوى.لك انت تتخيل ان واحد قالى كان بيكلم بنت من الناس اللى واصلين دول وبعدين بيقولها عايز اهاجر استراليا ولاّ كندا مع انه شغال فى شركة كبيره ومرتبه ماشاء الله.تقول ايه بقى انت عبيط هناك القانون بيطبق على الكل هنا يا ابنى كل حاجه بتخلص بالتليفون.

ماشاء الله لما الانسه دى بقى تتجوز هتربى ولادها ازاى.أما موضوع الانتحار ده طول عمرنا بقلنا فتره طويله قوى عايشين فى فقر مدقع.واحوال البلد سيئه بس مسمعناش عدد كبير قوى كده بينتحروا .

انا شايف الناس دى بجانب طبعا انها مخنوقين زى ناس كتير بس الاعلام بتعنا عمل شوا جامد قوى للى بينتحروا.ودلوقتى الواحد من المنتحرين يقول يا عم ما انا مخسوف بى الارض وانا عايش ومحدش حاسس بيه خلينا نظهر بقى فى التليفزيون ولو حتى بعد ما اتكل..ده طعبا تفسير مزاجى وممكن وكمان اكيد غلط بس تقول ايه يعنى فى العدد الكبير ده.

على العموم بقلنا نتكلم عن الاعلام المشوه.نأجلها شويه لحتى ما نبلع الكلام اللى اتقال.