والدة المحامى إيهاب ساعى الدين: «أبوالروس هو اللى ضرب ابنى بالكف على وشه الأول.. المفروض يقول له شكرا ولّا يحافظ على كرامته اللى ماحيلتهوش غيرها؟!»

«يعنى هو المطلوب إن ابنى يضّرب بالكف على وشه ويتهان تحت أرجل الحرس ويقع مغمى عليه، ويقول شكرا؟ وماينفعلش؟».. هكذا علقت والدة إيهاب الساعى، المحامى المحكوم عليه بالسجن 5 سنوات مع الشغل والنفاذ فى قضية الاعتداء على مدير نيابة ثان طنطا باسم أبوالروس، وأضافت: «إحنا ناس غلابة ولا نملك من الدنيا إلا كرامتنا، فهل أصبح الحفاظ عليها جريمة؟ مدير النيابة هو اللى ضرب ابنى الأول، يبقى ليه ما يتحاكمش معاه وكل صاحب حق ياخد حقه؟».

وقالت الأم «رجاء شرف» (58 عاما) ربة منزل لـ«اليوم السابع»: «لو كان ابنى إيهاب غلط فى الناس الكبيرة أنا بعتذر لهم علشان مستقبل ابنى مايضعش، لكن ما يرضيش ربنا إن ابنى يتحبس واللى ضربه حتى ما يتحققش معاه، كده أنا ابنى اتظلم ظلم بيّن وربنا هو الحق، وهو اللى هيخلص ذنب ابنى وهيظهر إن ابنى مظلوم وإنهم سجنوه علشان بيصفوا حساباتهم مع بعض، ومافيش حاجة فى الدنيا تقول إنه يحصل زى اللى حصل مع ابنى من ضرب وإهانات وفى النهاية يطلع هو المتهم ويصدروا حكم عليه بالسجن 5 سنوات.

وتضيف الأم والدموع تنهمر من عينيها: مين يصدق أن يكون مصير شاب فى مقتبل العمر السجن 5 سنوات، ده معناه ضياع مستقبله وتدمير حياته، وبدل مايبقى محامى كبير هيكون سجين، إحنا مش عايزين غير إن العدالة تاخد مجراها ويتحقق مع مدير النيابة اللى ضربه لأنه مش أحسن من ابنى، وأنا ناشدت النائب العام أن يرحمنى كأم ويصدر أوامره بالتحقيق مع مدير النيابة حتى تستقيم العدالة ومايكونش فيه كيل بمكيالين.

وقال شقيقه «وائل» الذى يعمل فى مجال التصميم والدعاية: إن إيهاب ضاع فى شربة ماء لأنه يعيش فى الدنيا بلا سند ولا واسطة واختار أن يحيا بكرامة ورفض أن تهان كرامته.
ويضيف شقيقه: «نحن أسرة مكونة من ثلاثة أولاد وبنت واحدة متزوجة وإيهاب هو الوحيد الذى أكمل تعليمه وتفوق وطلب أن يدخل الحقوق، ووالدنا كان موظفا بسيطا بمجلس مدينة طنطا ولقى ربه بعد مشوار طويل من المرض والألم، وقامت أمنا على تربيتنا وكنا ندخر كل طاقتنا حتى نرى إيهاب رجل قانون، ولكن أين هو القانون؟».

احتضنت الأم صورة ابنها ايهاب والدموع تنهمر من عينيها، وقالت: أناشد الرئيس مبارك التدخل لإنقاذ ابنى حتى لا يضيع مستقبله.