خالد صلاح

عصام شلتوت

أبوريدة.. تعاطفك لوحده مش كفاية

الثلاثاء، 20 يوليه 2010 07:21 م

مشاركة

اضف تعليقاً واقرأ تعليقات القراء
لو كنت عايز تقول لرئيس اتحاد الكرة كلمة مساندة.. يبقى لازم تقول له: تعاطفك مع الإدارة الحديثة.. والشفافية.. وتصحيح مسار اللعبة، والاقتراب من الصيغة التى نتمناها للاتحاد المصرى لكرة القدم.. مش كفاية؟!

إن الخيوط كلها متشابكة.. ومافيش حد هايقدر يقرب من محاولة تخليص الخيوط من بعضها، إلا بالتغيير اللى حصل، لأن سمير زاهر بدأ مشواره متعاطفًا مع الحداثة الكروية، وكان ناوى - على حد كلامه وقتها - أن يغير شكل إدارة الكرة المصرية.. لكن.

زاهر ساب كل شىء وتاه منه الكلام ونساه، لأن البيزنس بتاع بعض الأعضاء واجه رئيس الاتحاد السابق بقسوة، بالإضافة لكونه راجل مجامل جدًا جدًا فى حاجات البلد!

ببساطة.. لو أنا العبدلله كاتب الكلمتين دول هانى أبوريدة لازم فورًا أنتبه لأن وجودى عضوًا بالمكتب التنفيذى للاتحادين الأفريقى والدولى معناه أن الكيان الكروى المصرى هايكون تحت المجهر.. ولو افترضنا سيناريو لحوارات كانت بتدور بينك وبين زملائك فى المكتبين التنفيذيين عن خطايا الإدارة الكروية المصرية.. وابتعادنا عن الوصول لكأس العالم مرارًا وتكرارًا.. أكيد كنت بتقول لهم: يا جماعة أنا مش صاحب القرار؟!

طب دلوقتى أنت صاحب القرار، يعنى لازم الناس بتوع «الكاف» و«الفيفا» يشوفوا اتحاد الكرة مختلف زى زمان لما كان الاتحاد المصرى هو دليل الاتحادات الأهلية والقارية تطبع نسخ منه لتنفيذها وجعلها نبراسًا - حلوه نبراسًا دى - لهم.. آى والله كان بيحصل.

ولازم تعرف يا رئيس الاتحاد الجديد، إن اللى بيحبك وقانع بقدراتك لازم ينسى مصالحه ويتفرغ شوية لمصالح الكرة والاتحاد.. وكفاية اللى فات.. ونعتبره مات!

عايزين نشوف لجنة شؤون لاعبين كل حاجة فيها لها ضوابط وقواعد.. مش «خلطة بيطه».

عايزين لجنة حكام ماتعرفش أسماء ترجع اسم الحكم المصرى لقوائم بطولات أفريقيا.. والبطولات العالمية.

عايزين لجنة مسابقات تكون عارفة إن الأجندات تم اختراعها علشان تكون فيه مواعيد لسنوات قادمة للبطولات المصرية.
عايزين خبراء ومحترفين مش أعضاء هاويين ومنتخبين.. يكفيهم أن يضعوا استراتيجيات للكرة.. والمحترفين يطبقوها.. ولا.. ده عيب؟!
عايزين منطقة «ميكس زون».. ومؤتمر صحفى للمباريات زى البطولات فيه المدير الفنى وكابتن الفريق.. ويدخله بإذن الله الصحفيين.. مش المتفرجين؟!
عايزين حاجات تواكب الحضارة الكروية.. اللى بتتنفذ لما بتكون على رأس لجنة منظمة للبطولات... وأظن أنها بتحصل بنسبة 99 %؟!
إذا وضعت نظامًا مع مجلسك لا يمكن اختراقه.. وأى حد يهوب ناحيته ييجى النظام ده ضاربه بالبوكس!
بصراحة مطلوب منك كتير.. بس مش هاننتظر كتير.

وبصراحة كمان لازم مناقصات عالمية للرعاية.. والملابس.. مافيش حاجة اسمها الحبايب.. ولا بتوعنا.. ولا بتوعهم.. ولا بتوع الجن الأزرق!
باختصار لو كل الأسماء اللى معاكم كمجلس إدارة من نوعية محمد حسام الدين وعامر حسين.. يبقى اللجان هاتكون منضبطة وفى أمان.. يارب عقبال شؤون اللاعبين.. نقول آمين.

مشاركة

اضف تعليقاً واقرأ تعليقات القراء

لا توجد تعليقات على الخبر
اضف تعليق

تم أضافة تعليقك سوف يظهر بعد المراجعة





لا تفوتك
الرجوع الى أعلى الصفحة