عبدالواحد لحسام حسن: بصراحة يا كابتن.. مش مرتاح للّعب مع الحضرى!

تفاصيل مثيرة شهدتها الأيام الأخيرة فيما يخص صفقة انتقال عصام الحضرى حارس مرمى الإسماعيلى والمنتخب الوطنى للزمالك.. كانت المفاجأة الأكبر فيها هو قيام حسام حسن باستطلاع رأى عبدالواحد السيد بخصوص ضم الحضرى للزمالك بعدما علم أن حارسه أبدى اعتراضاً شديداً على ذلك وهدد صراحة بالرحيل، وقال له: هل ستكون عندك مشكلة لو الحضرى جه.. عبدالواحد فوجئ بمفاتحة المدير الفنى له فى الأمر، ولم يرد عليه فى حينه من صدمة المفاجأة وبعد التدريبات قام عبدالواحد بالحديث مع عمرو الجناينى لينقل له موقفه فى حالة قدوم الحضرى مؤكدا أنه راحل لا محالة.
وفى اليوم الثانى تصادف دخول عبدالواحد وحسام حسن معاً للنادى ودخل الثنائى غرفة الجهاز مباشرة ودار بينهما حوار فى حضور عماد المندوه مدرب الحراس.
الاجتماع الساخن تنفرد «اليوم السابع» بنشر تفاصيله كاملاً:
حسام: إنت كلمت الجناينى على موضوع الحضرى.
عبدالواحد: أيوه يا كابتن علشان لازم الناس كلها تكون عارفة موقفى من الأول، وبعدين إمبارح وأنت بتسألنى عن رأيى فى ضم الحضرى، لم أستطع الرد عليك إنت فاجئتنى.
تدخل عماد المندوه فى الحوار قائلا: لما يجيلك حارس جامد.. وهيزيد مستواك إيه المشكلة؟
عبدالواحد: يا كابتن عماد ما انت كنت بتقطع فيه.. دلوقتى بقى جامد.
حسام: يعنى إنت مش مقتنع بكلامى يا وحيد.
عبدالواحد: بصراحة مش مرتاح ألعب معاه فى فريق واحد.. وده بعيد عن الكرة خالص.
حسام: الحضرى بيحبك.
وحيد: يا كابتن ده ما بيقنعنيش.
إلى هذا الحد انتهى الحوار بين حسام وعبدالواحد نظراً لأن موعد التدريب قد حان..
بعض المقربين أكدوا أن سبب تمسك حسام بالحضرى هو ذلك الحماس الذى شعر به من خلال حديثه عن المستقبل فى حالة ضمه، حيث قال للمدير الفنى وشقيقه: أنا اللى هرجع معاكو البطولات.. وهحمس اللاعيبة وهعمل معاهم اجتماعات حتى يكون لديهم تحفيز دائم.