رامى زين يكتب: نادى الشعب

هذا المكان موجود فى كل دول العالم، ويلعب درجه أولى ممتاز كمان، وطبعا لا يلعب فيه إلا المحترفون.. المحترفون فقط، وطبعا النادى ده فيه منه عندنا.. بس اللاعيبه اللى فى النادى، اللى عندنا مفيش حد فى الدنيا عنده لاعيبه زينا.. وطبعا فيه شروط علشان تلعب فى النادى ده ممكن تلعب فى النادى ده عن طريق أنك تكون ضمن صفوف فريق نادى آخر، ويقوم ناديك بترشيحك للعب فى نادى الشعب، وهكذا فيقوم كل نادى من الأندية المعتمدة، والمصرح لها بمزاولة النشاط بترشيح اللاعبين اللى عايزاها لكى تدخل نادى الشعب، وممكن يتم اختيارك للعب فى نادى الشعب من المسئولين، بدون أن تكون عضواً فى نادى سابق بس أكيد، طبعا المفروض انك تكون بتعرف تلعب علشان كده اختاروك.. وهناك طريقه تانيه أيضا علشان تلعب فى النادى، وهى أن أهل حتتك يرشحوك علشان تلعب فى النادى زى أنكل زيزو حبيبى كده.. بس فى حاجه كمان ماينفعش تمضى عقد بأكثر من 5 سنوات هما 5 أقصى حاجة فى العقد الواحد ولو هما عايزينك تانى هيجددولك بس فى عقد تانى بعد انتهاء فترتك الأولى.

خلاص تقريبا كل اللاعيبه اللى فى نادى الشعب حاليا عقودهم قربت تنتهى.. فأما أن يتم التجديد لهم أو يتم الاستغناء عن خدماتهم.. وتجديد الدماء لأكبر نادى فى الدوله وهو نادى الشعب (النادى الجمهورى) على غرار المسمى المطلق على نادى ريال مدريد الأسبانى (النادى الملكى). والمتعارف عليه فى أنديه العالم كلها أن اللاعب يأخذ المال، وذلك نظير أن يلعب ويكون هدفه الاول والأخير مصلحة النادى وجمهور هذا النادى الذى وضع فيه الثقة، واختاره لكى يحقق لهم أمالهم وأحلامهم، ولكن عندنا الوضع مختلف فاللاعب يدخل نادى الشعب.

يأخذ أموالا وطبعا سلطة وحصانة لأنه لاعب فى نادى الشعب.. ثم يبدأ فى اللعب لحسابه لخاص.. وتجد اللاعبين فى نادى الشعب عندنا مشاغبون فتجدهم أثناء تواجدهم فى النادى.

منهم من يقذف زميله بالحذاء وآخر يسب زميله، وقد يصل الأمر إلى حد التشابك بالأيدى ولاعبون يخطئون ولا يحاسبون لأنهم مدللون.. لاعبون مهربون ولاعبون سارقون ولاعبون مرتشون ولاعبون مقامرون ولاعبون تجدهم عن التمرين كثيراً غائبون، ولكنهم لنصيبهم فى الربح ضامنون.. وأصبح نادى الشعب ليس بنادى الشعب ولكنه نادى لاعيبه الشعب الذين لعبوا بمهارة، لكى يصلوا إلى ما كانوا يريدون مستغلين شغف الناس بالساحرة المستديرة التى وضعوا داخلها كل آمالهم وأحلامهم ليغلقوا عليها ببلف ضيق يكتم أحلام هذا الشعب ويركلوها بالأقدام، ولن تستطيع أن تتكلم فأنت من اخترت هذا اللاعب، وأول ما لعب لعب بأحلامك.. وأول ما لعب لعب لمصلحته، فهل المشكلة فى لاعيبه النادى ولا جمهور النادى ولا مقر النادى؟