هيثم عبد الشافى يكتب: مدد

من جلابية حمرا
بكمام زرق
وبوز طالعلك م الخشب
من حقك تخاف يا صبى
ما هو لا صوتى صوتى
ولا ليا ف التوب فتلة
حتى الطرطور
كان ملك خيال مقاته
ع كل لون نبيت وسبرتو
سِكر ابن الكلمنجى
امتي أكبر وأمشى
جنبك يا غازية خشب
أهز وأطوح رأسى.. ع رنة صاجاتك
أقول مدد
مدد..
وانفض المولد
أراجوز بيدن ف مالطة
مدد..
فتافيت عيال وعضم طرى
يا مولد لا مقام لا ولى.. بلاها
ميلزمنيش
عيال المولد
تلعب فوق ضهر الدنيا
لا يلزمنى اتمرجح ولا أطير ولا أركب فرس
الحر ولى والشتا قرص
- خشب ضهرى زاد النص –
هس..
حرمت وانت خاف يا صبى وموت ف جلدك
طال قصر عمرك
اوعى تيجى ف يوم
وتقول نفسي أكبر