رامى زين يكتب: إزاى بيجيلك نوم؟

نفسى أعرف إزاى بيجيلك نوم.. وأنت شايفنى نايم ع الرصيف كل يوم.. من كتر ما أنا شايل هموم.. خلاص طقيت وطلعت م الهدوم.. بقالى كام شهر ما بقبضش مهية.. وياما ليك اشتكيت والحالة زى ماهيه.. وجنبى ع الرصيف مجموعه الـ45.. قاعدين مستنيين قرارالتعيين.. وناس تانيه عايزه معاش يكفيها.. عشان تعيش بكرامتها وما تمدش أيديها.. وناس عامله جنازة صورية.. بتترحم فيها عليك وع الديمقراطية.. وغيرهم فاض بيهم.. وف وسط الشارع ناموا.. مش همهم يداس عليهم.. ولا أن الناس عليهم لاموا.. صدقنى من اللى أنا فيه فاض بيا.. وبقيت بعمل حاجات غير إرادية.. ودماغى كل يوم رايحه وجايه.. فى سؤال بيقول ليه ما بتسألش فيا.. هو أنت ما سمعتش أيه اللى بيا.. ولا أنت فاكرنى ع الرصيف بمثل تمثيليه.. على العموم هانت فترة وهتفوت.. والانتخابات أهى جايه.. أدى دقنى لو أديتك صوت.. يا بتاع الوعود الوهمية.. نفسى أعرف الانتخابات الجايه هتوعدنى بأيه.. أكيد هتوسع الرصيف عشان أعرف أنام عليه.