د.أشرف شاهين يكتب: مولد التغيير ومولد السيدة زينب

مش قلت لك التغيير جاى جاى قالها محمود مبتسما وهو يقدم كوبا من الليمونادة الباردة لكمال.
أجابه كمال باقتضاب كعادته:
- مش عارف
-مش عارف إيه يا عم بقولك قريب قوي البلد هينصلح حالها وهتبقى زى الفل
- برضه كلامك عايم زى العادة ومافيهوش تحديدات واضحة
- تحديدات واضحة ازاى ماهى كل حاجة واضحة زى الشمس هو كل اللى بيحصل فى البلد ده ميوصلشى بطريقة حتمية للتغيير.

خد عندك مثلا يا سيدى، الفساد إللى انتشر فى الحكومة وفضيحة الوزراء واالمسئولين قدام كل المصريين
انهيار التعليم
انهيار الصحة
السرقة والرشاوى
إضرابات العمال
فضيحة انتهاكات الحكومة لحقوق المواطن المصرى قدام العالم كله
تزوير الانتخابات
انهيار نظرية التوريث
ظهور البرادعي وشباب ٦ أبريل
حركة جمعية التغيير
التغيير أكيد جاى علشان الناس بدات تفوق.

أجاب كمال:
- يمكن الناس بدأت تفوق بس علشان تقوم من على السرير وتغسل وشها وتفطر وتشرب الشاى ،أشك أنها هتكون لسة عايشة.

- ياعم خليك متفائل اضحك للدنيا تضحكلك أهم حاجة الخطوة الأولى.

أجابه محمود:
- الخطوة الأولى صحيح مهمة بس أنا شايف إن الشعب بيستريح وقت طويل بين الشوطين، وإنت عارف إن الحكومة بتضغط وبتستعمل ضد الشعب كل الحيل والأساليب الشرعية وغير الشرعية، الشعب لازم يفوق ويغسل وشه بسرعة وينزل ياخد حقه فى الشارع، الشعب لازم ما يخدشى استراحة بين الأشواط، لو استمر على أسلوب الاستراحات دى يبقى قدامنا ١٠٠ سنة تانيين، والله أعلم هيبقى فيه شعب ولا لا أنا أشك فى ذلك، لو الحكام المصريين استمروا على نفس نمط الحكم يبقى قول يا رحمن يا رحيم على الشعب،
صحيح المصريون فى الفترة دى محظوظون بتواجد رجل زى الدكتور محمد البرادعى بينهم، بس الفرص اللى زى د ى ما بتجيشى لشعب ما إلا كل خمسين سنة مرة، لازم كل مصري يستغل الفرصة دى لسبب بسيط إن البرادعي بيعطي بعد دولي لقضية التغيير في مصر ,.بس مش عارف ليه حاسس إن محدش فاهم الموضوع دة إلا الشباب بتاع ٦ أبريل.

-ازاى الشعب فاهم وإنشاء الله هيتحرك- فاهم ازاى إذا كان الراجل بيحاول يصحيهم وهما نايمين طول النهار علشان بيسهروا طول الليل فى الموالد، تخيل الليلة الختامية بتاعة مولد السيدة زينب حضرها أكتر من مليون شخص جاءوا من جميع أنحاء مصر وفضلوا طول الليل سهرانين وتاعبين نفسهم، في حين الوقفة إللى حضرها البرادعى فى الإسكندرية بمناسبة شهيد الطوارى حضرها ٥٠٠٠ وكل الناس هللو على الحضور الغير مسبوق، يعنى بذمتك ده كلام يطمن.

- بس إنت كده بتلقى المسئولية على الشعب الغلبان
- فيها إيه مش هى دى الحقيقة، شعب عمال يقضى وقته فى الهيافة حضور موالد ومباريات، شعب عمال يصرف على المنظرة وسايب الأساسيات، سايب حقوقه الأساسية ولما تيجى تقول له إنزل الشارع وجيب حقك، يتحجج عايز أيمن نور والصباحى، وطلعت السادات ينزلوا هما ويبهدلوا نفسهم في الشوارع علشان يطالبوا بالحقوق إنما هو ليه ينزل يبهدل نفسه شعب عامل فيها آل إيه زكى.

خلاص خليه قاعد يتفرج على الماتشات والمسلسلات ويحضر الموالد،ويبقى ييجى يقابلنى لو لقى ياكل أو يشرب بعد كده.