رامى محمد زين يكتب: حكاية قديمة ومن زمان

كان يا ما كان .... حكاية قديمة ومن زمان...واحد كان عامل غلبان...وف يوم خبط ع الجيران..

وأول ما اتفتحتله الببان ...قال ممكن عندكوا أنام ... أصلى غريب عن المكان ...وسيبونى أعيش وسطكوا ... واعتبرونى واحد منكوا ... والجيران طلعوا ولاد أصول .... وبدون تفكير وافقوا
على طول ... وكان السؤال المسئول...أسمك أيه يا أبن الأصول؟ .... رد وقال على طول صهيونى.. ها موافقين تبيتونى؟....كل واحد من أهل الدار بص للتانى .. وجوه عيونه دارت أسئلة كتيرة فى ثوانى ... وبسرعة قبل الرد ...صهيونى خاف ليكون بالرفض ...فلحق وعرض عرض ... قال ممكن أشترى منكوا الأرض ..وأخد منكوا كمان الدار ... والمبلغ المطلوب هدفعهولكوا بالدولار ... وقولوا لأهلكوا أشترى منهم ... وخلوهم كمان يقولوا لغيرهم ...

وفعلا اتباعت الأرض كلها ... وصهيونى اشتراها وطرد أهلها ... وجاب عشيرته كلها ... وخلاص أخدها واحتلها ...وياما اشتكى أهل الدار ... وكان الرد الضرب بالنار... وقالهم ما كان ف أيديكوا القرار ... حد قالكوا تتعاملوا معايا ... ما قلتلكم إنى صهيونى

من أول الحكاية.