دكتور مدحت نافع يكتب: البت "سوسو"!!

لعـاشر نوبة قبل الفيمتو ثانية
وآخر شوكة فى صحن اللازانيا
غمزنى واد لمض غرقان كولونيا
وقاللى بص شوف البت "سوسو"!!

على مد البصر وقفت صبية
طليها بنطلون أو جلاّبية!!
وبودره وكحل أو ضربة "بونية"
وتسريحه تقول: يا خلق دوسوا

و"سوسو" معلّقة حلقان كتيره
كرامة للحاجات المستديره
وساحبة بلطجية من المنيره
لزوم الأمن والفن وفلوسه

أتارى الست فنانة ونصيبها
تعيش "أرتيست" وتعاند صاحبها
تودّى كل يوم سحنة وتجيبها
يقوم النطع ع الصندل يبوسه

يا خوفى ع البنات المستحيه
تشوف "سوسو" تقول دى مهلبيه
ح نعمل زيّها بكره العشيه
وسلملى على بابا ودروسه

يا ناس الموضه لو خلّت صحابها
"قرود" و"معيز" بتلمع.. سدّوا بابها
دا ربك صنعته لو حد عابها
منين ييجى بأنهاره وشموسه؟