إنسان ضعيف
ضعفه يبان فى شدته
شهواته قدرت شدته
وخلته .. علشان رغيف
إنسان ضعيف
****
حالف بربه وبالسما
لهينتصر
من قبل أول ملحمة
وقع انكسر
ما عرفش معنى العولمة
وكأنه عاش فى الكون كفيف
إنسان ضعيف
****
عاش دنيته
معملش حاجة لآخرته
كترت جراحه وبكته
شاف من الربيع برد وخريف
إنسان ضعيف
****
محتاج لحد يفهمه
اية يبنى حلمة اللى انتهى
وإيه يهدمه
مين اللى يقدر ينصفه
ومين يظلمه..
محتاج لحد يعلمه
إزاى يعيش فى الكون شريف
إنسان ضعيف
****
مش هو بس
هو وأنا ..
الضعف ماشى فى دمنا
مع إننا..
كنا بشر.. صبحت قلوبنا من الحجر
وطفينا بإيدينا القمر
وحلفنا أنا.. ما شفنهوش
ما عرفنهوش
فين القمر.. راح القمر
طيب مين هيبقى صاحبنا أيام السهر
ماهو كلنا عاشقين سهر
وأنا وحدى من بين البشر
عارف بأنى بقيت ضعيف
راح اعيش ضعيف
وهأموت ضعيف
علشان ما أضحيش بالرغيف
وأحلف بأنى بقيت ضعيف
إنسان ضعيف
مشاركة
اضف تعليقاً واقرأ تعليقات القراء
مشاركة
