هناء المداح تكتب: مولد وصاحبه غايب

غريب فى وطنى تايه وحيد ما ليش مكان سارح شريد

ساكت وصابر سنين طويلة لا حد سائل وما فيش جديد

وطنى ده مولد وصاحبه غايب أزمات وفوضى وكله سايب

خيرنا لغيرنا ما لينا نايب طول عمرنا دايماً بعيد

مولد وصاحبه عمال يبيع لا همه حاجة نولع نضيع

حجم الديون بقى شىء فظيع ويا ريت بننجز بها شىء مفيد

غريب فى وطنى ما ليش حقوق وكل مادا الحال يسوء

لا حد عايش غير الّلى فوق وإحنا فى بلدنا ولا العبيد

وكأننا تحت المداس ما لناش وجود من الأساس

مافيش ضمير ولا إحساس داسوا ولسّه حنشوف أكيد

غريب ومنّى ملايين كتير ونروح لمين ما لنا كبير

حال الغلابة صبح خطير وكل يوم آلام تزيد

حكوماتنا دايرة تقول شعارات ووعود كتييير وتصريحات

يوم الخميس يوم التلات وكله كذب ولا بيفيد!