فيسبوك
واتساب
أسامى الناس كتير
وكل اسم منهم
فـ بلدنا دى له مصير
مصيرك انت تغرق
ف بحر هموم يذلك
وتلقى الخوف فـ ضلك
وهواك جواك أسير
مصيرك انت تحزن
وتنسى الشوق وتسكن
فـ سجن بسور كبير
مصير البنت ديا
اللى بتسكن عنيا
تشوفى بموت فـ ثانيه
على إيد سفاح كبير
مصير الورد يدبل
وشمس الفرحة ترحل
وأملنا يقع فـ بير
مصير الطير يغادر
عن الحضن اللى غادر
بعد ماكان كبير
مصير أشياء كتيره
فـ بلدنا هتبقى سيره
وفـ انتظار مصير
مصير الغصن يدبل
ولون النيل يعكر
ولا يدى أى خير
مصير طفلى البرىء
يتوه وسط الطريق
ويعيش فـ الكون غريب
الكل مصيره واحد
مادام للظلم ساجد
وكمان بيقول آمين
ياريتنا نقولها لا
بقلوبنا بنية صادقة
وكفايه بلاش شخير
يا شعب النيل يا وارث
خليك ع الأرض حارس
لسه الأحلام كتير
أصرخ بالصوت وقاوم
دا الحق أكيد مداوم
بس انت انوى بضمير
