تعالى نعمل اتفاقية ونشوف مين المظلوم.. إيه رأيك تاخد المهية وتأكلنى كل يوم.. ولمدة شهر واحد نخلى الحال ده يدوم.. وبعدها نشوف العيب ف مين الحاكم ولا المحكوم..
بس عشان تبقى الاتفاقية طبيعية ومنطقية.. لازم تضيف فيها كل البنود الأساسية..
وتدينى كل احتياجاتى اليومية.. قدام اللى هتاخده مهية.. بتقول تحت خط الفقر ست جنيات
يومية.. لا ما تقلقش هسهلها عليك شوية.. والمهية اللى ف الاتفاقية خمستاشر جنيه يومية
أكلنى 3 طقات.. وركبنى بيهم مواصلات.. مش لازم تاكسى ولاسرفيس.. ده احنا بتوع الأتوبيس.. وما تنساش تدفع نور وميه.. دول من أساسيات الاتفاقيه.. ولو رحت للدكتور مرة سيب حسابه عليا.. ولو قولتلك فسحنى يوم.. طنشنى وما تسألش فيا.. ولو قلتلك عايز هدمة جديدة مرة.. ما تسألش فيا بالمرة.. هو أنا يعنى هدومى مرقعة .. ده مفيش حتة فيها مش متبقعه.. بس مش هطلب منك أنا كده سعيد.. عشان حاسس أنك هتجبلى
هدوم جديدة ع العيد.. ومصاريف العيال ما تنسهاش.. تعليم حكومى من أبو بلاش.. وقبل
آخر الشهر بخمس أيام.. جالى منك جواب.. بيقول إنك ف الإنعاش.. وما قالش أيه الأسباب.. ولما جيتلك عرفت الأسباب أيه هيه.. قولتلى قبل آخر الشهر خلصت منى المهية.. وطلبت سلفة من الشهرية الجاية.. عشان أعرف أنفذ الاتفاقية.. وساعتها بس عرفت.. العيب فيك ولا فيا.
مشاركة
اضف تعليقاً واقرأ تعليقات القراء
مشاركة
لا توجد تعليقات على الخبر
تم أضافة تعليقك سوف يظهر بعد المراجعة