أطفال شوارعنا ضحية مين؟
براءة مقتولة بصمت أنين
خاطرمكسور وقلب حزين
طفل برىء وماشى بيعانى
ضحية أب حقيقى أنانى
أو أم بالتأكيد ضحية واحد جانى
أطفال ضايعة وماشية بتشحت
مادة الإيد
كل ما تكبر خطورتها تزيد
مش لاقيه صدر حنا يضم
طفل برئ مش لاقى عطف
تحرش جنسى وسرقة وخطف
عريان مجروح
مابيعرفش إيه طموح
مش عارف حتى فين يروح
باين على وشه الجوع
مهموم مهزوم
دبلان زى الوردة ف عز خريف
تايه فى سكة مش لاقى رجوع
بينادى ويصرخ فى المجتمع
محدش فعلا ً ليه استمع
حافى الأقدام
نحيف
على أى رصيف
بيصحى و بينام
كله الآم
وفيهم بالتأكيد أيتام
متشرد محروم من أى علام
محبوسة جواه الفرحة
مخنوقة جواه الأحلام
يادوب بياخد منا كلام
أطفال شوارعنا قنبله موقوتة
شايفينها بتكبر ليل ونهار
أديها بترن جرس إنذار
ضحية فقر أوبيت منهار
أو خلفة زيادة باستمرار
أطفال شوارعنا قنبله موقوتة
قلوبنا عليهم قاسية حديد
طفل شغال متهان
ماتقلش حقوق الإنسان
مش لاقى رحمة ولا إحسان
محروم من اللعب
ملفوف فى أكفان النسيان
براءة بتموت
فى سكوت
بتصرخ مكتوم جواها الصوت
مش لاقية القوت
نتأثر لما نشوفها تعدى
وننسى اللحظة بسرعة تفوت
براءة مقتولة ضحية مين؟
بصمة عار فى كل جبين
أطفال للبيع وتجارة بشر
مبدأ أنانية بينا انتشر
عيون بدموع مليانة عتاب
شعور بالحقد بتملا كتاب
بيقولوا ليه سايبنا نعانى؟
قاسى الكل علينا أنانى
فين الرحمة وفين أحباب
معانا الحضن الدافى غاب
أطفال شوارعنا قنبله موقوتة
امكن يبقوا فى يوم إرهاب
مصدر إزعاج وكل دمار
أو يبقوا ضحية للتجار
دعارة وبانجو كمان أوكار
أطفال شوارعنا ضحية بجد
براءة مقتولة وحلم اتهد
عايزين نظرة عطف حقيقى
عايزين إيد الخير تتمد
مشاركة
اضف تعليقاً واقرأ تعليقات القراء
مشاركة
