راضى على حسين يكتب: أطفال الشوارع

طفلة بريئة فى سن الست سنين
ماشية فى صمت كأنه أنين
ماشية حافية تبيع مناديل
مرسوم ع الوش الحرمان
بصمة عار فى كل زمان
لمَّا طفل برئ يتهان
وردة دبلانة
مكسورة الخاطر قلب حزين
عليها باين كل الجوع
مش لاقية للحضن الدافى رجوع
نطرة عينها فيها دموع
وفيها همس لكل الناس
ضميركم مات وفين إحساس؟
نظرة فيها حقيقى عتاب
نظرة تملا ألف كتاب
بالرغم الصمت مليانة كلام
بتصرخ من جواها جروح وألآم
ليه؟
منسية تايهة فى وسط الزحمة
قلوبكم قاسية وسودة زى الفحمة
ماشية
كل الحزن عليها مخيِّم
مستقبل قاسى وشكله مغيِّم
طريقها ضباب وشوك وضلام
امكن ديه ضحية أب أنانى
أو أم
براءة مقتولة بتعانى
محرومة من طعم أمان
مش لاقية صدر حنان
يضم
بالتأكيد دية ضحية واحد جانى
وامكن دية طفلة يتيمة بجد
حلم الفرحة معاها اتهد
محتاجة رعاية وإيد تتمد
والضحكة ترجع ليها من تانى
وتلاقى الرحمة مع الإنسان
كرامة ولقمة يادوب ع الكد
مين ليها غيرك يا رب؟