أنا ابن مصر وبطاقتى أهيـه
أنا شعبان من وردان
أنا ناخب طبعا وليا صوت
طول مانا عايش وأنا إنسان
جاى انتخب مرشح شورى
ممكن أعرف أين المكان
إزاى كدة أنا عاوز أدخل
أنا نفسى مرة أكون شعبان
مانتو قولتو روحو انتخبو
وأنا جاى اهو أنا والزمان
وانا لا ف حزب ولا أى جماعة
لاعرف لا وطنى ولا إخوان
أنا ناوى انتخب نزيه الدايرة
وسع بقى يا مرضان
مش هنتخب بتاعكو يا سيدي
أنا حـر يا عم أنا مش جربان
يعنى إيه أروح بيتنـا
لقح إيـدك يا حيوان
صندوق إيه دة ورايح فين
فين القاضى والشجعان
أصوات مين ورايحة فين
اوعى إيـدك يا فسدان
هى تانى هتبقى كوسة
مش قولتو اللى فات مش رجعان
مش حرة ونزيهة دة كان الوعد
ولا الغويشة بقت كردان
لا حـد دخل ولا حـد صوت
زور زور يا أبو قردان
آه يا وطنى لك يوم برضو
بالجزمة تنداس ذليل متهان
أنا مش هسكت أنا هشتكيكو
أنا رايح حالا ع العنوان
يا لجنة عليا منعونى أدخل
مصيرك إيه يوم الميزان
آه يا صورة مقلوبة نايمة
أبيض واسود مش ألوان
ومين اللى اتكلم معايا دة
يا ترى بلطجى أم نهبان
يا مجلس يا قومى خدلى حقى
اشتغل بقى يا حلفـان
ينفع كدة مدخلش أصوت
عشان أنا وطنى صميم أصلان
قابضين كام قولولى يا ناس
ومين اداكو صوتى كمان
محدش فيكو صحيتلو نخوة
مين هيصبر يكون عيان
والصحافة قالت دى مفاجأة
فعلا دى طبخة عجان
واللى معاكو فقعو عنيكو
وبقى الشبل عاشق ولهان
واللى بزيتو وبسكرو
وبكنتاكى جمع جدعان
شوفت يا جحا مش انت لوحدك
اللى حمارو طلع حيران
واللى فاز ف اللى فاتت
وف بتاعتنا كان عشمان
طلع م المولد بلا ألف حمص
واللى بألف بقى بخسان
واللى معارض نجح بغرابة
والمصيدة عدت دبـان
وف الإعادة الكوسة طرحت
صنف تانى عمل أطنان
والمجتمع المدنى دة داخ
مات ف الآخر مات كفـران
وابقى قابلنى يا صاحبى وقولى
فين الصدق ف الإعلان
مش بس كدة يا عم مدحت
داللى استخبى كان نصران
وحكايتنا دى مش جديدة
دى بتحصل خوفا أو ف أمان
وعينى عينك سياسة مايعة
صايعة ضايعة مرات سجان
والشعب المصرى راضى وساكت
بالذمة شفتم كدة رضوان
والشعب جاية ورياستو جاية
واللى ف بالنا تمام كسبان
مبروك عليكو يا مصريين
اللى انتو فيه بكدة ثبتـان
لا نمو ولا ازدهار
طول ما الشعب كدة غلبان
ثور يا مصرى قوم خـد حقك
كسر بقى طوب التوهان
لا الدستور راضيين أوى عنو
ولا اللى عملو كان علمان
عشان ربنا قال ف الأديان
عشان نفيسة مرات سرحان
دى سهلة جدا ومرة واحدة
وحد صوتك ف المليان
احفر اسمك ف التاريخ
فلان وجمعة والهجان
تقدر تغير بس انت انـوي
مستنى إيه طب يا هفتـان
ماهى الانتخابات أهيه أهيـه
والمستقبل جاى ضلمان
بلدى بتاعتى مش بتاعتهم
والتاريخ حكى يا فنـان
إنو المصرى اسمو منور
قطع للظالم ألف ودان
لما فكر أوى ف بلادو
كانت بلادو أجمل بلدان
والسياسة هى كل حاجة
واللى يقول غير كدة غلطان
لو فيه حاجة قولى عليها
بس يا ريت ما تكون زعلان
أنا م الزعيق صوتى اتنبح
واللى فهمنى دة كان نعسان
وأنا لا بحرض ولا أى دياولو
كل الحكاية أنا واد تعبان
مشاركة
اضف تعليقاً واقرأ تعليقات القراء
مشاركة
لا توجد تعليقات على الخبر
تم أضافة تعليقك سوف يظهر بعد المراجعة