فيسبوك
واتساب
الأصل الطيب غلاب
ويعلى كل الأنساب
وزى ما قالوا الأحباب
الأصل الواطى أهو غاب
والأصل الطيب غلاب
الأصل الطيب له أمارة
مش كله عيله وعمارة
ولا حتى تكون شيخ الحارة
الأصل الطيب بيبان
وكلامه الطيب عنوان
وتملى معاك وقت الشدة
وفاهم كلمة إنسان
الأصل الطيب موجود
وكرمه ما يعرفش حدود
ولا يقفل عمره يوم باب
وتملى حواليه أحباب
ورضاه من نظره يببان
والواطى يا ناس كداب
وتملى يخلف فى وعوده
وفى وقت ما تتمنى وجوده
تلاقيه شارد فى عيوبه
ويحاول يقلب فى جيبوبه
وبيهرب من غير أسباب
تلاقيه بالليل زى الزبده
ويدوب من غير أسباب
والواطى ملهش أبواب
وتقوله فينك يامعلم
يبوس أيدك ويعمم
الواطى كان لسه معايه
قال أيه قدامى فى مرايا
وفى ضهرى يغرس سلاية
والأصل الطيب غلاب
والأصل الواطى أهو غاب
