يا دنيا ليه..؟؟!!.. أنا الجريح
وبعيش حياتى كده تفاريح
ليه دايما الحب الجميل
مستحيل
إنه يعيش ويدوم
وكل يوم
مجروح جديد من الهوا
قلبه اسا وانكوا
ومعدش ينفعله دوا
وإيه اللى ينسى الهموم؟
اللحطة الحلوة بتتسرق
والحب مسيره للغرق
وذكرى كانت.. شايلة بكره
قدام عيونا بتتحرق
ليه بنبدأ بالأسية والحنان قدامنا باين
واللى خاين
يقول بأعلى صوته لأ
ألف لأ
أنا مش بخون
ولا عمرى بكيت العيون
والورد اديه مالى الجناين
واللى باين ..
منه حب، وشوق، ولهفة
جايز جاله.. بس صدفة
مش حقيقة
والحقيقة..غنه خاين
اللى خان يقدر يخون ألف مرة
والأمان ليه خطر
والمطر
مهما يغسل من جراحنا
برده روحنا
فيها حزن من الآلام
لو حكتها بالكلام
مش حينفع فيها شرح
وكلمة .. فرح
كلمة صعب إن نلاقيها
الزمن بيهد فيها
والبقية.. تكفى مين ولا مين
تكفى مية 100
بس إيه يسعد ألوف
كلها أحزان وخوف
م الزمن
م الحياة
م المصاعب والظروف
واللى يشوف.. يتعما
والقمر طالع حزين ف السما
سامع آهات القلوب المغرما
إنما.... حيعمل إيه القمر ويا البشر
والشمس ممكن إنها
تبخل عليه بضيها
وفين يلاقى زيها
تانى القمر
والورد دبل عالشجر
واللى هجـــــــــر
قلبه حجـــر
ساب المطارح.. واللى طارح
شوك وخوف ومفيش أمل
والصورة.. بدأت تكتمل
صورتى هيه
وجنبها حاجة ليا
أيوة ..أيوة دى بطاقة الهوية
الاسم: مجروح مصاحب دمعته
والحزن صاحب لوعته
والناس بحالها سمعته
بس كل الناس مجاريح
وأنا.. برده جريح
السن: بعيش فى يومى 100 سنة
أقابل قلوب وألسنة
وأعيش وأموت برده هنا
وأبنى أنا بنفسى الضريح
علشان أنا.. أنا الجريح
العنوان: الدنيا سجن
والسجن
بابه اسمه الحياة
اسمه الزمن
والقدر.. هوا السجًان
والناس بتجرى فى المكان.. متنهدة
واللى يقول غير كده
مش صحيح
علشان أنا.. أنا الجريح
مشاركة
اضف تعليقاً واقرأ تعليقات القراء
مشاركة
لا توجد تعليقات على الخبر
تم أضافة تعليقك سوف يظهر بعد المراجعة