أسامة غانم يكتب: نفسى

نفسى الدكتاتورية ترجع تانى وبلاش من الحرية غير المسئولة التى خلتنا ملطشة لكل من هب ودب.

نفسى نرجع لأيام إن حد ميقدرش يفتح خشمه إلا أن يقول حاضر ... تمام يا فندم وينفذ كل أمر وميخلفوش ولا يتمنظر ويقول أنا حر ولية رأى مستقل ووجهة نظر ويجتهد.

نفسى ترجع تانى الدكتاتورية عشان نضبط الأسعار ويغلى على الناس بمزاجه وترجع مباحث التموين. نفسى يرجع حكم الفرد عشان محدش يطلع يشنع على حد ويتهمه بالحق وبالباطل.

نفسى ترجع تانى الدكتاتورية عشان نترحم من هليبة الانتخابات وزفة الكدابين
نفسى تانى يرجع حكم القهر ... داحنا كان عندنا إنتاج أحسن من النهارده ولا كان فيه حراميه سولار و أزمة عيش ودقيق مدعم بيتسرق و كان رغيف العيش زى الفل .. ولا كان حد يقدر يهين مصر يتقوى بالخارج.

نفسى ترجع تانى دولة الشاويش والصول لان مكنشى فى الحرامية دى كلها ولا كان فى تحرش جنسى فى الشارع عينى عينك.

نفسى أشوف حد اتاخد وهو بيدافع عن بلده مش بيخرب فيها ويستعدى عليها الأمريكان واليهود، ولا كان بيتسجن عشان بيحب البلد وكان بيقول الحرية الحرية.
ده الآن بيندب حظه وبيقول يارتنى ماقلت الحرية ......الحرية عشان النهارده بيهينوا البلد باسم الحرية وسيبين الحرامية باسم الحرية.

أنا عارف أنتم هتقولوا عليه مجنون
أصل حرية مع جهل تبقى مصيبة
أصل حرية مع فجور تبقى كارثة
أصل حرية مع همج تبقى فضائيات مش مسئولة وإبداع مش معروف، وتبقى مصر لا هى رائده العالم ولا حد بيحترمها.
أنا مجنون ولاعيان بالحرية.