أسامة غانم يكتب: حدوتة مصر والجزائر

تفتكر عزيزى القارئ موضوع الجزائر هيرسى على إيه؟
إحنا عمالين نضرب فى بعض وننشر الغسيل الذى إذا أردنا أن ننظفه محتاجين خمس سنوات دعك فى غسالة دبل فول أوتوماتيك وفيها جميع المساحيق والكلور.. برضه هيطلع فيه بقع لأننا لا بنعرف نغسل ولا بنعرف نحط مقادير التنظيف.

إيه اللى بيقوله مستر زاهر فى الجرائد والقنوات التليفزيونية هو بينسى هو قال أيه هنا ولا هنا مفيش حد يقول له اطلع ويقول إحنا اتحاد الكرة معرفناش ندير عملية ملف الجزائر وإحنا آسفين يا جمهور مصر ويريحونا من الردح على القنوات والاتهامات بل والدفاع الذى يدين أكثر ما يبرئ.

ما كفاية كده الإخوة العاقلين ده لو فيه.. يجلسوا مع بعض ويرتبوا الأمور ويطلعونا بشىء صحيح وجد علشان دى بلدنا وكفايانا بهدلة، ثم الناس اللى بتغلوش على الأحداث المنفلتة من جماهير الأهلى والزمالك والإسماعيلى محدش بيحطلها حل جذرى ولا هيه دى مصالح برضو ثم ما الذى يدريكم من أن الإعلام الجزائرى اللى ماشى سداح مداح فى مصر بيصورها صوت وصورة وبيبعتها إلى الاتحاد الدولى والاتحاد الأفريقى اللى إحنا شاطرين نقطع فيه وبس وأظن أن الصور دى تخدم مصالحهم وكده العملية باظت قوى وأنا من وجهة نظرى المتواضعة على كل الإخوة الأعزاء الذين يسمون مجلس اتحاد الكرة الموقر كفاية كده مصالح ومكاسب ويريحونا باستقالاتهم ويحمونا من خدماتهم التطوعية.

وكمان وزير الإعلام يطلع قراراً شديداً للإخوة المصلحجية والذين يتكلمون بالسبق الإعلامى لو حد فيهم تعدى حدود اللياقة وتخطى حدود البرنامج وفقراته يحرم وميطلعش علينا تانى بهلته البهية.