"مش عارف ليه ساعات بلاقى أكتر من فكرة فى دماغى أفكار غريبة يعنى إيه علاقة طريقة رسم الموج و ووفاة جدتى ببعض؟ ليه كل ما أفكر فى واحدة أفتكر التانية".
"فى يوم ما ماتت جدتى مبكتش عليها ولا حتى زعلت و لغاية دلوقتى رغم إنى كنت بحبها جداً ... فى الحقيقة عمرى ما بكيت على حد مات و لا حتى زعلت ... هو أنا مبحسش بالموت ليه نفسى أعرف".
" طول عمرى كنت بشترى الهدوم مع والدتى _ربنا يخليهالي_ كانت دايماَ مش عاجبها اختيارى لأنها عايزة تجيبلى هدوم واسعة ومريحة وخامتها كويسة كنت برضى وبحمد ربنا بس جوايا كنت مستنى اليوم اللى أجيب هدومى بنفسى ... دلوقتى بحكم إنى عايش بعيد عنها بشترى هدومى لوحدى بس بقيت عايز الهدوم الواسعة المريحة اللى خامتها كويسة".
"بحب ربنا جداً والطبيعى إنى أحب اللى بيدعوا لربنا بس مش عارف ليه مش عارف أخرج من دماغى إن كل الشيوخ حفيظة ونصابين وبيبيعوا أعشاب طبية"
"من ساعة ما بعدت عن عيلتى وأنا بأكل أكتر وأنام أكتر وأعيش أقل ".
"ضحكتى شبه ضحكة عم محمود و مشيتى شبه مشية مش فاكر مين بنطق حرف النون زى مروى و بسلم زى الممثل الفلانى مش عارف ليه حاسس إنى سارق حاجة من حد رغم إنى مش قاصد".
"بقكر كتير فى الحب و إنى أحب و عاشوا فى تبات و خلفوا صبيان و بنات رغم كدة مش متخيل إنى هبقى مسئول ولا أتجوز فى يوم هو أنا كدة إنسان مش كويس؟"
"بنحب ربنا وعارفين إنه موجود ليه بنعصيه عقلنا بيروح فين ؟".
مشاركة
اضف تعليقاً واقرأ تعليقات القراء
مشاركة
لا توجد تعليقات على الخبر
تم أضافة تعليقك سوف يظهر بعد المراجعة